WILLEMSTAD – Den un seremonia chikí i ameno riba patio di Universidat di Kòrsou Dr. Moises da Costa Gomez (UoC) Rector Magnificus dr. F. de Lanoy i direktor di Maduro & Curiel’s Bank, Chicu Capriles, a firma dia 30 di yanüari 2018 akuerdo pa un kátedra (“leerstoel”) di 4 aña ku ta karga e nòmber di defuntu señor Lionel ‘Paps’ Capriles.  E kátedra “Financial Management Science” ta keda kordiná pa Prof. Dr. Jacob Spronk ku tabata dekano di e programa di MBA na Erasmus Universiteit Rotterdam.

Despues di a firma e kontrato sr. Capriles na nòmber di famia i di MCB a gradisí pa e honor i a entregá un bunita piesa di arte di un turtuga. Turtuga ta un animal ku ‘Paps’ semper tabata gusta i ku alabes tabata e vishon di negoshi i di bida di sr. Lionel ‘Paps’ Capriles. Defuntu señor Capriles semper tabata bisa ku nos mester ta manera un turtuga ku mester saka su garganta afó pa e bai dilanti, tumando asina e riesgo ku ta morde su garganta kita afó. Asina nos mester saka nos garganta i tuma e riesgo responsabel pa nos por tin éksito den nos negoshi i bida. Paps Capriles mes tabatin un kolekshon grandi di turtuga ku pueblo di Kòrsou por atmirá na e brènch di Rooi Catootje.

Prof. Spronk a indiká ku ta un honor pa su persona pa a keda nombrá riba e kátedra aki i konhuntamente ku staf di Fakultat di Siensia Sosial i Ekonómiko i MCB lo traha pa engrandesé e konosementu di nos studiantenan den e mundu finansiero i di henter nos komunidat riba e tereno di siensia di maneho finansiero. Den e afan aki lo bai enfatisá riba e hub (intermediadó) ku Kòrsou lo por hunga den e mundu finansiero global ku énfasis riba e abilidatnan di siglo 21 ku awendia ta birando krítiko pa nos profeshonalnan ta poseé. Tambe a anunsiá ku UoC otro aña (2019) lo kumpli 40 aña di eksistensia i parti di e selebrashon lo ta un konferensia internashonal di Finansa na Kòrsou ku partisipashon di eminensianan di e mundu finansiero global. Alabes lo bai tin diferente charla i tambe marshe popular pa nos komunidat por oumentá su konosementu riba e tereno aki. Ku e kátedra aki UoC, MCB i Kòrsou en general a dal un paso firme pa yega na realisá un di e soñonan di Paps Capriles, esta pa engrandesé Kòrsou komo un sentro finansiero den mundu.