komo organisashon ku ta kontribuí na edukashon i desaroyo di nos muchanan

WILLEMSTAD- Na 1997 Maduro & Curiel’s Bank a inisiá ku e tradishon di entregá den luna di desèmber e prestigioso rekonosementu, MCB Prize. MCB Prize ta rekonosé un persona, evento òf organisashon ku a sobresalí i/òf a hasi mas impakto den transkurso nos a duna organisashon sosial. E aña aki gerensia di Bo Banko Amigu a skohe pa duna un organisashon ku ta traha riba e aspekto sosial i edukativo. Gerensia di Bo Banko Amigu a evaluá aña 2013 i ta ku honor ta entregá MCB Prize 2013 na un organisashon ku a demostrá su balor den nos komunidat dor ofresé mayornan    ta   e oportunidat pa nan yunan por  desaroyá nan mes físikamente, mentalmente, spiritualmente, emoshonalmente i sosial, pa e por funshoná i partisipá di un manera positivo i aktivo na desaroyo di nos komunidat. Kada mayor por ta trankil nan trabou.  Ta p’esei e aña aki MCB Prize ta bai pa Fundashon Desaroyo i Progreso. Na momentu di entrega di e premio, Chicu Capriles, Presidente di Maduro & Curiel’s Bank, a bisa: “Mi ta sumamente kontentu ku e aña aki nos banko por rekonosé Fundashon Desaroyo i Progreso ku MCB Prize 2013. Ta ku plaser nos a tuma nota ku e fundashon ta enfoká riba desaroyo di mas ku 2000 mucha di entre 6 pa 11 aña, despues di ora di skol, repartí den 21 diferente bario, for di Fuik te Soto bou di guia di ekspertonan ku ta dediká nan tempu na siña i motivá tur e muchanan. Alabes nos ta felisitá Fundashon Desaroyo i Progreso ku resientemente a kumpli 10 aña di eksistensia. Konsiderando e embergadura di e organisashon aki, e aña aki MCB Prize 2013 ta kompaña pa un chèk di NAf. 25.000,- ku e organisashon por sigui invertí den e programa di training di  guianan i asina garantisá kontinuidat di e desaroyo positivo di tur e muchanan”. Dies aña pasá riba 17 di desèmber Fundashon Desaroyo i Progreso a keda lantá ku e úniko meta pa invertí den nos hubentut  dor di komplementá mayornan den edukashon di e muchanan. Esaki mediante inovashon, kreatividat i edukashon dirigí i kontinuo. Algun di e aktividatnan ta guia di hùiswèrk, aktividat di formashon deportivo i artístiko  i eskurshon pa e muchanan.Algun di e ganadónan di pasado di e prestigioso premio di MCB ta Jewel Investments & Management Group N.V., desaroyadó di Pietermaai smal, CITRO, Curaçao North Sea Jazz Festival i mas. Chicu a finalisá bisando: “DANKI na Fundashon Desaroyo i Progreso pa tur loke boso a hasi pa Kòrsou i pa nos muchanan.” Riba potret: sr. Chicu Capriles presidente direktor di Maduro & Curiel’s Bank huntu ku sra. Nicole Henriquez presidente di hunta di komisario di MCB na momento di entrega di e chek di NAf. 25.000,- na direktiva di Fundashon Desaroyo i Progreso.