Willemstad – Ku gran orguyo MCBGroup ta anunsiá ku su sistema di pago ku tarheta di krédito i débito interaktivo Point-of-Sale-2-Point-of-Sale (POS2POS) ta optenibel awor. E sistema aki ta hasi e proseso di pago pa tantu komersiante komo kliente mas lihé i fásil komo ku e montante ku e kliente tin ku paga ta keda indiká direktamente riba e POS terminal di Banko for di kaha di komersiante.

Ku e interakshon di POS2POS e kahera no tin mester di hinka e montante di pago mas riba e POS terminal pa asina e kliente por paga ku su tarheta. E sistema mes ta konektá direktamente ku e kaha elektróniko di e negoshi pa e POS terminal di Banko i e kliente mes por hinka su karchi i su PIN. Únabes ku e transakshon di pago ta aprobá, Banko su POS terminal ta manda e notifikashon di aprobashon bèk pa e kaha elektróniko ku na su turno lo imprimí e resibu i komprobante p’e kliente, tur esei den algun sekònde.

E sistema akí ta hasi e proseso di transakshonnan di tarheta bai mas lihé i ta fásilita e atministrashon di transakshon di tarheta pa e komersiante. Tambe e ta permití pa prent un resibu so pa kada transakshon. E promé implementashon di e sistema akí a tuma lugá resientemente na The Movies i The Cinemas i pronto lo sigui mas. E sistema aki tambe lo ta optenibel den un forma mas amplio pa hotel i restorantnan.

“Esaki ta otro solushon inovativo ku MCBGroup a trese riba merkado pa reforsá su relashon ku su klientenan komersial,” sr. de Sola, Managing Director di Maduro & Curiel’s Bank a bisa. “Keda pendiente pa mas anunsio di solushonnan inovativo di Maduro & Curiel’s Bank.”