Willemstad – Djárason 6 di sèptèmber Orkan Irma, un orkan devastador, a baha ku tur su forsa i furia riba Saba, Sint Eustatius i St. Maarten lagando kasi henter e pueblo prinsipalmente di St. Maarten den problema serio i desampará. Mesora Maduro & Curiel’s Bank a reuní ku Rampenbureau pa determiná kon ta bai yuda e islanan afektá. MCB a aserká Don Andres pa huntu transportá algun material di promé nesesidat pa
St. Maarten. Tabatin hopi petishon di otro empresarionan ku tambe a uni pa hasi uso di e oportunidat aki pa manda komestibel i vários material pa aliviá e islanan afektá pa orkan Irma. Ta di apresiá ku na momento ku gerensia di Don Andres a nota e koperashon i union asina grandi di diferente kompania, riba nan propio inisiativa, gerensia di Don Andres a hasi un “upgrade” di Don Andres pa Doña Luisa, e barku mas grandi. Doña Luisa a sali djaluna 11 di sèptèmber ku 14 kònteiner rumbo pa St. Maarten pa yuda esnan afektá pa orkan Irma. Pa djárason, un dia después ku orkan José a pasa e isla, Doña Luisa a yega St. Maarten.
Maduro & Curiel’s Bank ta yama un DANKI di kurason na famia de Jongh, propietario di Don Andres Shipping i Doña Luisa ku a pone e barku na disposishon pa bai St. Maarten den forma di donashon, pues sin kobra niun gastu adishonal p’esaki.
Danki tambe na tur esnan ku a duna nan aporte, entre otro, UTS ku material pa re-establesé komunikashon. Krus Kòrá Kòrsou, Goisco, Moises de Marchena, gerente di Curaçao Airport Hotel i diferente mas. Aqualectra a perkurá pa awa i Curoil pa diesel. Tur komo donashon !
Un danki spesial ta bai na Insel Air ku a regla tarifanan benefisioso pa MCB manda koleganan di MCB Kòrsou i CMB Aruba ku e promé buelo pa bai yuda koleganan di WIB i empleadonan di Scotiabank na St. Maarten. Insel Air su kontakto i servisio tabata fantástiko.
MCB ta yama un danki spesial tambe na tur kolega di MCB, CMB i WIB ku di un òf otro manera a yuda pa prepará e biahenan aki pa St. Maarten.
Maduro & Curiel’s Bank ta konbibí ku nos hermana islanan di St. Maarten, Saba i St. Eustatius; i naturalmente ta enkurashá un i tur pa hasi donashon na Krus Kòrá Kòrsou riba kuenta 2004 di MCB pa por sigui yuda e damnifikadonan.