Medidanan di prekoushon pa maleta bandoná


Willemstad –Djarason atardi pa apróksimadamente 5:30PM, Polis di Aeropuerto den kolaborashon ku FOL i Kuerpo Polisial di Kòrsou (KPC) a tuma medidanan di prekoushon na e area di Salida (Departures) na Aeropuerto Internashonal di Kòrsou, durante investigashon di un maleta bandoná. A evakuá e terminal i e rampa i limitá akseso na aeropuerto. Pa apróksimadamente 07:45PM spesialistanan di eksplosivo na KPC a deklará e area komo safe atrobe.

Na promé instante, ora a tuma nota di e maleta, Polis di Aeropuerto a purba na lokalisá e doño. Despues ku no por a lokalisá e doño den e Check-In Hall i besindario, e prosedura di seguridat pa protekshon di biahero i usuario di aeropuerto a drenta na vigor. Outoridat di Aviashon Sivil (CCAA) tambe tabata presente pa por a tuma nota di e proseso.

Polis di Aeroperto huntu ku FOL a hasi e investigashon preliminar na e maleta ku un asina yamá ‘sniffer’. Na momentu ku a detektá sierto supstansia notabel, a tuma kontakto ku KPC pa e spesialistanan di eksplosivo por a hasi nan investigashon. A evakuá tur usuario di aeropuerto ku tabata den aproksimidat di e sitio  i riba rampa, i a guía tur persona pa e alokashon di evakuashon. Un buelo internashonal a drenta, kual mester a warda riba taxi-way te na momentu ku a deklara e situashon komo ‘safe’. Otro buelonan ku tabata pendiente pa sali, a prepará pa esaki mes ora, i guiá pa Toren a sigui rumbo pa nan destinashon. Durante e investigashon e bahada riba kaminda pa aeropuerto  tabata será pa tráfiko.
Despues ku Kuerpo Polisial a deklará e maleta i e área komo ‘safe’, por a reanudá operashon den e area di Check-In Hall/Departures. Tabata trata di un maleta bashí ku probablemente biaheronan a laga atras.