E outor di Maffia Meid, e outobiografia impaktante di Nyorka Lindeborg, mihó konosí Nina, ta na Kòrsou pa presenta su buki. Djahueps awó, 1 di yüni, 2017, di 6 pa 8 PM, e lo tin un ‘Meet & Greet’ den Chit Chat Café na Mensing Caminada, unda e lo presenta e buki i papia di su eksperensianan. Lugá ta limita, pues por registra te ku djárason na info@mensings.com pa asina garantisá akseso na e evento. Nina su historia ta fungi komo un inspirashon i atvertensia serio pa hóbennan pa no skohe un karera den kriminalidat. Apesar di un hubentut turbulento, ta remarkabel pa mira kon Nina a tuma rienda di su bida i awor ta pasa su tempu papiando ku hóbennan den riesgo i mamanan soltero. Aktualmente TeleCuraçao ta grabando un dokumentario di su bida i durante su estadia na Kòrsou, e lo tin varios enkuentro ku prensa.

Ku diesdos aña, nan ta rank’e fo’i su padrastronan na Kòrsou i mandé pa su mama na Hulanda, kende tabata traha komo prostituta na Arnhem huntu ku su pareja nobo. Nan tabata terorisá i abusa di Nina sin mizerikòrdia i asina a pone e hóben hui fo’i kas. Ta sigui un bida extraordinario rondoná pa droga i prostitushon na Twente, Friesland, Groningen, Amsterdam i Rotterdam. Nina ta sumergí su mes profundamente den trafikashon di droga, i ta drenta den un relashon ku un di e narkotrafikante di más grandi di Rotterdam, Surinam i Antias Hulandes. E ta bira un di e transportado di droga di más importante i ta hungá un papel estelar den e top di e sindikato. Pa años, Nina ta logra di skapa e garanan di hustisia i por poko a skapa ku su bida.

Danki na su personalidat kolorido, e sa di sobrebibí. E buki di e historia di Nina ta ofrese un entrada den e mundu fasinante i violento di e sindikato di krímen ku raisnan na Antias, Surinam i Hulanda i ta konta kon ela logra sali fo’i e bida akí. Ko-outor Hendrik Jan Korterink ta skirbi pa entre otro Nieuwe Revu i Panorama. Anteriormente ela publiká varios ‘bestsellers’ kua ta inkluí Bruinsma BV, Haagse Penoze i Cor – e sekuestradó di Heineken, Cor van Hout. Diariamente e ta skirbi di krímen riba su wepsait http://www.misdaadjournalist.nl