Willemstad – Resientemente JCI Willemstad durante di su reunión di miembresia a tene un enkuentro di informashon kaminda a invitá e hòben profeshonal sr. Lernnerth Angela pa elaborá riba e tópiko di seguridat den trafiko na Kòrsou. Nos a konta tambe ku presensia di 2 parlamentario den persona di sr. Yael Plet i sr. Stephen Walroud.

Tabata un presentashon super na nivel den kua a trese diferente aspekto dilanti kiko ta esensial pa por tin un trafiko aun mas sigur. Tambe a repasá algún estadistika di aksidentenan ku a tuma luga kual hopi aspekto a kondusi na esaki p.e. outonan defisiente, ekseso di velosidat, uzo di alkohol, no a huza faha di seguridat ets. ets. Otro temanan di relevansha ku a diskuti ariba tabata falta di leinan adekua ku mester indika na ki banda e stür di un outo mester ta i kòntròl pa ku porsentahe di alkohol serka outomobilistanan i tambe riba posibel opshonnan pa prevení e oumento di filanan i mehorashon di nos infrastruktura pa mas usuario por partisipa den nos trafiko na un manera sigur. E informashon i interakshon balioso ku a surgi ta indiká ku gobiernu por parte tin un tarea pa halsa e nivel i frekuensha di konsientisa nos komunidat riba e tema di seguridat den trafiko. E ta toka nos tur i den presensia di sr. Plet i sr. Walroud nos por a sinti ku nan lo bai duna nan aporte na esaki den Parlamentu.

JCI Willemstad di su banda tambe lo keda pone atenshon i énfasis pa nos trafiko por bira mas sigur, ku menos aksidente, viktima i dañonan material.