Gang di Arte a conoce un crecemento unda mas di 200 hoben a participa na Gang di Arte unda casi 60 ta participa pa e premio maximo. Na momento cu e proyecto a keda presenta pa Minister di Cultura Sr. Otmar Oduber, e evento a tuma luga den un sala na e studionan di Telearuba. Mirando e energia di e hobennan e Minister mesora a constata cu Gang di Arte mester bay na e siguiente nivel. E mandatario kier mira ampliacion di e programa unda mas hoben por participa. Awe el a crece bira asina grandi cu mester a pone den un Cas di Cultura cu un sala completamente yen.

Minister Oduber a gradici e esfuerso grandi di e ekipo di Departamento di Cultura, specialmente Jhon Freddy Montoya y Julie Merencia y tambe Fredy Tromp di Dream Dare Do, cu a haci posibel cu e hobennan a desplega nan talento riba escenario.

Gang di Arte ta un di e programanan cu ta andando den e momentonan aki cu ta enfoca riba hobennan. Banda di dje tin Korteweg, cu ta brinda e generacion nobo pa demostra nan arte y cultura, Art Rules tambe ta un otro proyecto di hobennan riba diferente disciplina di arte tambe nos por menciona e proyecto di AMP unda hobennan ta bay colabora y forma parti di un proyecto di arte publico yama Aruba Mural Projects y asina por menciona mas… Aruba ta resalta cu nos hobennan riba e tereno di arte actualmente. Un empuhe enorme pa nos Cultura.

Gang di Arte ta celebra e di 10 aniversario otro aña y esaki ta un tremendo paso na caminda pa e celebracion grandi.