September ta luna di monumento y a bira un custumber cu den e luna aki tin diferente actividad. E aña aki a culmina e luna cu un fiesta den cunucu. Minister Oduber ta bisa: “Ta importante pa tin mas di e actividad aki pa trece mas di e historia di nos herencia tangibel y intagibel cu awe ta keda presenta den un combinacion na e cas aki, situa den curason di San Nicolas.”

Grandi y chikito a disfruta di e Fiesta di Cunucu na na Amsterdamstraat 21, di un tremendo fiesta cu mercado di Santa Rosa cu a conta cu platonan tipico y productonan local mientras tabata disfruta di nos cultura den tur aspecto! Tabata tin actividadnan manera contamento di storia, obra di man pa mucha y presentacion di patrimonionan bibo organisa pa Museo Historico. Presentacion Musical di entre otro caha di orgel, bandanan tipico y tambe gruponan di baile.

Monumentnefonds, departamento di Cultura y otro entidadnan tur a traha hunto pa por a sera e luna di actividad aki cu un broche di oro. MInsiter Oduber a gradici cada un di nan y a termina bisando:” Arkitectura y musica tipico, monumentonan, productonan local…nos herencia cultural, nos raisnan a resalta awe! Pabien na cada un cu a forma parti di e Fiesta di Cunucu.”