“Minister Palm ta firma MoU ku IBP”


Willemstad – Minister Palm dia 17 aprel 2015 a firma un ” Memorandum of Understanding “(MoU) ku International Baseball Partners(IBP).

E akuerdo aki ta enserá ku Minister Palm den representashon di gobièrnu di Kòrsou huntu ku Sr. Michael Powers den representashon di IBP, lo hasi tur lo posibel pa asina logra yega na un business plan pa e proyekto aki i pa asina sigurá ku e proyekto aki lo bira realidat. IBP mester di ayudo di Gobièrnu pa entre otro e terenonan (8 hèktar pa kada ekipo), pèrmit di estadia pa e hungadó- i coachnan, eksonerashon di impuesto riba material i demas kondishonnan di impuesto, pa menshoná algun. Di nan banda IBP lo sòru pa por lo ménos 4 ekipo bin establesé nan mes den e temporada  di verano aki na Kòrsou. Pa e 4 ekiponan aki por práktika i realisá enkuentronan nan lo tin mester pa kada ekipo 2 vèlt standard i 1 vèlt di infield. Ademas mester di fasilidat di alohamentu i “weight training” pa tantu e hungadó- i coachnan. Kada ekipo ta konsistí di 80 hungadó.  Esaki ta nifiká ku pa e promé fase di e proyekto, Kòrsou lo ta pa 320 hungadó profeshonal. E posibilidat ta hopi grandi ku unabes e 4 ekiponan establesé na Kòrsou e sobrá 26 ekiponan di Major League Baseball tambe lo sigui. Esaki lo subi e sifra na 2,400 hungadó profeshonal di baseball na Kòrsou. Naturalmente un punto importante den e realisashon di e plannan aki ta e aprobashon di MLB ku ta pendiente ainda.

Esaki sigur lo tin su impakto ekonómiko, konsiderando e kantidat di divisas ku e sektor aki lo generá, e rekonosimentu di nòmber di Kòrsou ku lo yuda nos turismo, i e kantidat di kupo di trabou ku esaki lo nifiká pa nos hendenan lokal, tantu den e área di mantenshon di e vèltnan, umpire, scorer, komo den e parti di alohamentu, kushina, limpiesa, seguridat i mas.

Ku firmamentu di e MoU aki ta duna inisio na e proyekto pa Kòrsou por krea su sektor ekonómiko nobo: BASEBALL

 

Presente durante di e konferensha di prensa tabata:

Minister Asjes, Minister Palm, Sr. Michael Powers i Sr. Joel Bradley di tim Orioles