Mandatarionan di Aruba, Corsow y Sint Maarten a reuni riba tema di aviacion y maritimo

Minister Otmar Oduber a habri siman cu bishita di su homologonan tanto di Corsow Minister Suzy Römer y di Sint Maarten Minister Claret Conner. Un bishita concentrando riba e tema di transporte, y a discuti temanan di interes comun den e aspecto di aviacion como tambe maritimo. Invitacion pa e Top Overleg aki ta bin despues cu na 2010 a firma e prome protocol di MOP. Despues di 5 aña ta na su lugar pa evalua diferente puntonan. Un reunion cu tabata tin su momentonan intensivo pero cu por lo general a bai masha ameno.

E mandatario di Corsow a comenta cu e ta masha contento di con e conversacionnan a bay. Pa Minister Römer esaki ta su prome encuentro informativo cu su coleganan unda a haci diferente palabracionnan di ki paso lo tuma den futuro desicionnan. Pa lo cual ta trata e area maritimo ta bay wak e cooperacion cu Aruba, mirando cu recientemente Aruba a inicia cu un sistema nobo di cobranza pa barconan cu ta ancra den awanan teritorial y unda e isla ta genera fondo. Curoil di Corsow porcierto tambe ta expandiendo su halanan aki na Aruba. E minister ta sigui comenta “mi ta mira diferente posibilidad pa sigui traha hunto cu tanto Sint Maarten como Aruba na beneficio di e tres paisnan den e area maritimo.”

A toca tambe e tema di aviacion unda e mandatario di Corsow ta wak e situacion for di e punto di bista cu Aruba y Corsow ta islanan ruman y no ta mira e sentido pa para cu discucionnan bieu. Sra. Römer ta sigui splica: “Ta mas importante pa wak futuro con cu nos kier coopera cu otro, mi ta sigur cu tin caminda pa haya otro y siña tambe di otro unda por intercambia informacion y conocemento pa engrandece tanto e parti maritimo como e parti di aviacion.”

A palabra cu lo sigui traha hunto riba con pa implementa e asina yama “rijkswet” como cu e parti maritimo ta algo na nivel di Reino. Minister ta bisa: “Como 3 pais hunto por prepara mihor, cada un cu su posicion, cada un cu su interes, pero na bienestar di nan paisnan, mescos cu por ehempel Europa, nos tambe den e Reino aki, den e area den Caribe, nos tambe por mira con nos por sostene otro. Den e area di investigacionnan di seguridad, si tin incidentenan cu ta pasa den nos area lo mester por traha hunto enbez di cada un riba nan mes.”

Minister Otmar Oduber a menciona cu pa prome cu fin di aña lo bolbe sinta hunto pa delibera riba e posicionan di cada un pais, y pa hunto tuma un desicion. Sra. Römer ta bisa di ta sumamente satisfecho ya cu e tin sigur cu lo cual tin nos dilanti, nos futuro, si nos mira otro como partner, hunto por traha na bienestar di cada pais. Minister Römer ta termina bisando “Nos ta mara unda nos interesnan ta comun, na bienestar di cada un su Pueblo. Mi ta sigur cu cada un di nos lo percura pa un mihor entrada pa nos paisnan, y percura tambe cu cada un di e trabounan ta reparti di tal forma cu ta haci uso di otro su experticio y otro su experiencia.”

Pa e Mandatario di Sint Maarten, e oportunidadnan cu a delibera durante e reunion ta topiconan al caso. Como paisnan cu ta forma parti di Reino ta reconoce oportunidadnan cu tin na momento cu sinta hunto pa resolve retonan cu tin individual.  Na momento cu uni di e forma aki ta bin cu solucionnan inteligente. Minister Conner ta expresa “Pami ta un gran placer di ta aki den e posicion di minister mirando cu Aruba tin un lugar special den mi curason. E posibilidadnan ta sin limite den e area di aviacion y maritimo.”  Sr. Conner ta comenta cu en berdad den algun area algun ta mas avansa cu otro pero esaki ta e momento unda ta realisa cu nos por traha hunto y asisti otro cual ta e relacion cu mester tin entre islanan ruman den Caribe. Minister Conner ta finalisa bisando  “Mirando e posicion geografico di Sint Maarten den e aspecto maritimo, Sint Maarten por fungi como gateway pa Aruba y Corsow pa por yega na otro mercado den Caribe.” Pues ta solamente dilanti por bay cu e plannan cu tin.

Intencion ta a bay bek nan pais pa dilebera riba e posibilidadnan treci dlanti y pa topa otro bek prome cu fin di e aña aki ainda.