Monumentenbureau kier a informa comunidad di Aruba cu pa motibo di mudansa entrante 28 di juli lo ta cera pa publico te cu 3 di augustus 2015. E departamento di gubernamental lo ta den mudamento pa realoca bek na Schelpstraat 36-38.

Bou di maneho di Minister di Cultura, Sr. Otmar Oduber, tin como prioridad pa restaura y conserva nos monumentonan. E edificio Henriquez no ta un excepcion y mester su mantencion adecuado. E edificio ta bou di encargo di Monumentenbureau pero cu fondonan disponibel atravez di e propio propietario di e edificio, Fondo di Monumento, a logra completa e proyecto y awor e ta cla pa entrega. Durante e proyecto trabou di arkitectura y liderazgo di henter e proyecto tabata den man di Monumentenbureau.

Directora di Monumentenbureau Sra. ing. Yvonne Webb-Kock, ta agradecido pa e cooperacion di Fondo di Monumento cu a brinda na nan tur sosten pa e mudansa. “E no ta un cooperacion nobo, ta hopi aña Monumentenbureau y Fondo di Monumento ta realisa proyecto hunto, sin lubida e departamento di gobierno cu ta encarga cu e parti tecnico.” e directora ta bisa. Ehempel di e colaboracion aki ta proyectonan manera Watertoren, Censo y ARA djis pa menciona algun.

E proyecto di mantencion grandi di edificio Henriquez situa na Schelpstraat 36-38 a wordo ehecuta pa EcoAruba Line development.

Entrante diamars 4 di augustus 2015, portanan ta habri manera custumber pa tur contratista, arkitectonan, muchanan cu sa busca informacion di historia di nos monumentonan pa scol, peticionnan pa permiso di monumento, pa tur asunto di monumento, y publico en general lo por pasa libremente cerca Monumentenbureau. Nos number di telefon 5835938 y nos email monumentenburo@setarnet.aw lo keda igual. Nos kier a pidi nos disculpa pa cualkier inconveniencia cu e mudansa por a ocasiona.