Willemstad, Djaweps 18 di desèmber Teatro Luna Blou lo tin su di tres edishon di “Movie under the Moon”. Esaki lo tuma lugá den e hardin di Luna Blou pa 7or di anochi. Di 24 pa 29 di desèmber Teatro Luna Blou tabata tin The Traveling Caribbean Film Festival 2014. Durante un siman largu tur bishitante por a disfrutá di diferente pelíkula informativo tokante músika i orígen di músika di diferente isla den Karibe. E reakshon di e públiko tabata unu hopi positivo. Tur esnan presente a disfrutá di e ambiente ku tabata tin na Luna Blou i a hasi petishon pa organisá esaki mas biaha. Pa e motibu aki Teatro Luna Blou a bin ku e inisiativa pa organisá tur djaweps un anochi di pelíkula kaminda tur hende por bini i disfrutá di un pelíkula bou di airu liber, den e hardin di Teatro Luna Blou. Miéntras ta disfrutá di e pelíkula por disfrutá di un tremendo pan ku stoba, pan ku filet, sòpi i hopi mas. E siman aki e pelíkula ku lo keda pasa ta “The Black Creoles”. Un pelíkula ku ta konta orígen di habitantenan di Nicaragua i di nan kultura bilingual(Ingles i Spañó). Un pelíkula sumamente interesante i ku lo engrandese un i tur ku wak e su konosementu. Bin pasa un ratu ameno i disfrutá di un bon pelíkula bou di airu liber na Teatro Luna Blou. Entrada ta kosta solamente 13,50. Pa mas informashon por bishita nos página wep :www.lunablou.com òf yama nos na 462–2209.