Banco di Caribe ta kontribuí ku transporte pa muchanan di skol

WILLEMSTAD:  Djaluna último Banco di Caribe su konvoi a buska muchanan di diferente grupo di Kolegio Iris Bruyning, Prins Bernhard College, St. Franciscus College i Krijtschool pa hiba nan SDK kaminda nan ta sigui lès di natashon. Aña pasá FDDK a inisiá e programa di natashon eskolar i tur siman e konvoi ta buska i hiba e muchanan di skol pa SDK i na fin di lès ta hiba nan skol bèk.

Lès di natashon ta esensial den kuríkulo di kualke skol i Banco di Caribe ta masha kontentu di por aportá na e programa aki ku transporte. Ademas di siña téknika di natashon, e mucha ta desaroyá su karakter sosial ku otro kompañeronan di klas. Konsiderando ku mayoria mucha ta rekreá den ambiente familiar na playanan di Kòrsou, ta importante pa nan sá kon pa landa. Landamentu ta un abilidat indespensabel den bida di kualke hende.  Sr. Pomario kordinadó di e programa di natashon eskolar a bin ta hasi un bon trabou pa motivá e muchanan den nan práktika. Ta importante pa muchanan mantené un bida salú i aktivo. Banco di Caribe ta felisitá FDDK ku un programa di natashon eksitoso!

Tokante BdC Express III

Pa hopi aña BdC Express a transportá mucha pa ekskurshonnan edukativo, hiba nan paseo di skol i sirbi komo transporte pa diferente organisashon non-profit. E shofùrnan di BdC Express, ta yuda ku e propósito úniko pa sirbi komunidat di Kòrsou. Pa bin na remarke pa uso di e servisio grátis di BdC Express por bishitá www.bancodicaribe.com