Music For Education ta un radioton cu Caliente FM 90.7 ta organisa caba pa terser anja consecutibo, e radioton aki tin como proposito pa nos juda nos muchanan di menos recurso di Fundashon Pa Nos Comunidad pa asina nan tin suficiente articulo di skol pa nan por cuminsa un schooljaar nobo jen di motibashon. Den nos promer anja nos a logra juda mas cu 300 mucha, anja pasa nos a logra nos meta di juda mas cu 500 mucha, y e anja aki nos proposito ta pa nos juda mas cu 1000 mucha. Tur persona cu kier colabora cu e causa aki por aserca nan mes na studionan di Caliente FM 90.7 (Windstraat 29, banda di Wong Sheoung Wong Restaurant/dilanti di parkeerplaats di RBC di Caya Grandi) y trese nan donashon sea den efectibo (e placa lo bay wordo inverti den school supplies) of cu articulonan di skol (schrift, pen, potlood, tas, etui, gum, sker, slijper, lineaal, etc). Pa cada donashon cu bo hasi, bo ta ricibi a cambio un CD cu e 19 canticanan mas popular di momento. E radioton mes lo tuma lugar dia 8 y 9 di augustus, (cuminsando dia 8 for di 6pm) na Palm Beach Plaza Mall, unda nos team completo di 10 DJ’s lo hasi un transmishon on air pa 24 ora non stop, unda e idea ta pa nos sigui ricibi mas aporte di henter e comunidad di Aruba, esaki tambe por ta sea den efectibo of cu articulonan di skol. Dia di radioton nos lo bay tin diferente actividad, manera Zumba, demonstrashon di curpa di K-9, competencia di microfutbol, concurso di pintura pa mucha, y hopi mas. E anja aki Caliente ta conta cu e apoyo di Cool FM, Fresh FM, Zoom Aruba, Pulso Latino, Print Media, 4 Sale Magazine y Palm Beach Plaza Mall. Si bo kier hanja mas informashon tocante nos radioton, of bo kier ofrece bo mes manera boluntario bo por jama nos na 5822339 of na 5666077.