WILLEMSTAD – Despues di un ousensia bastante largu ta hasiendo e trámitenan pa bolbe ku e programa Rockourora djasabra 30 di yüli for di 10 or di anochi pa topa solo djadumingu 31 di yüli te 7 or di mainta. E programa ta kuminsá bibu den studio di Curom/Mi 95 (95.7 FM). E tradishonal trio Pinedo-Heyden-Heiligers lo animá e último ora di e gran programa aki djadumingu mainta bibu for di playa na Caracasbaai. Anto e oyentenan ta invitá pa presensiá ourora ora solo ta saliendo aya.

Base di e programa ta keda músika rock & roll di añanan 60 i 70, pero lo demostrá tambe kon e músika di e añanan ei ketu bai ta bibu-bibu den interpretashonnan kontemporáneo i ku lasonan ku otro géneronan musikal, manera jazz, blues, montuno, klásiko, reggae, etc. Mariano Heyden, Percy Pinedo i Frans Heiligers lo bòltu nan kashi di disko pa kumpli ku petishonnan insistente pa laga e piesanan di oro zona den aire atrobe – di Al Kooper pa Led Zeppelin, di Maná pa Carlos Santana, di Janis Joplin pa Tina Turner, di Beatles pa Rolling Stones, di Deep Purple pa Osibisa, di Grand Funk pa Jimi Hendrix, i asina tin hopi músiko mas di renombre internashonal ku aki na Kòrsou tambe tabata inmensamente popular i ku tin nan fanatikada ketu bai. E presentadónan lo bai ku tèrmo grandi di kòfi pa gasolin no kaba ku nan durante e programa maratóniko aki. Kada ken ta liber pa organisá su mes ambiente na kas, na playa, den outo, den boto, unda ku ta, pa saboriá músika rock di e bon tempunan aya di guitara plat, den bon kompania di amigu i konosí kombiná ku karni riba grel i sufisiente líkido pa refreská garganta.