My Digicel App tin 550,000 usuario kada luna


Ya kaba tin 6.5 mion di app den mundu

WILLEMSTAD – E industria di app rònt mundu ta inmenso i ta sigui krese. Ya kaba tin 6.5 mion di app den mundu i kada dia ta añadí 60 mil aserka. Na Kòrsou mes nos ta papiando di entre 200 pa 300 app lokal. E sifranan sorprendente aki tabata parti di e presentashon ku Digicel a duna djamars na Renaissance riba e tema di ‘Teknologia nobo i My Digicel App’.

“Nos ta biba den un mundu den kua teknologia ta manda, den kua konsumidó ta den kòntròl”, asina Jorge Cuartas, interim marketing manager di Digicel a bisa durante e presentashon. “Konsumidó ke app ku ta fasilitá nan bida, ku nan por manehá ora nan ke i di e manera ku nan ke, i ku ta fásil pa usa. Den e kuadro ei tur luna nos ta saka un vershon nobo ku mas opshon di My Digicel App, pa nos klientenan por manehá nan kuenta di Digicel.”

Usuario di ‘My Digicel App’ ta haña ofertanan spesial, manera deskuento òf mas data riba nan Quick Pick Bundles. Ademas nan por usa e app pa kontrolá nan transakshonnan, pa rekargá nan telefòn, òf pa regalá nan ser kerí un plan. Resientemente a introdusí e opshon di ‘call me’, ku por usa ora bo saldo a kaba. Sin gastu pa bo mes bo ta pidi un hende pa e bèl bo. Otro funshon hopi gusta ta e ‘live chat’ ku e departamentu di servisio i ku ta duna asistensia rápido na kliente.

“For dia ku a lansa My Digicel App un aña pasá, 2.4 mion di hende a download e app”, asina Jorge Cuartas ta bisa. “Kada luna tin 550,000 usuario rònt mundu, na Kòrsou ta trata di un 20% i e kantidat aki ta krese kada luna. Ku esei My Digicel App ta mustra ku e ta ideal pa e mundu den kua nos ta biba.” Por download e app via www.mydigicel.net.