Willemstad, Despues di tres wikènt eksitoso di e komedia “Nan a Gar’é den Chino’, pueblo di Kòrsou tin e oportunidat di disfrutá di dos funshon mas. Djasabra 28 yüni pa 9or i djadumingu 29 yüni pa 8or di anochi Grupo Jag ta presentá “Nan a Gar’é den Chino”. Kiko por pasa ora ku un hende ta biba un bida dòbel? Esaki ta loke e Juni Aniceta i su grupo ke ilustrá den un forma teatral pa asina duna un aporte na konstruí un mihó komunidat. Un parti di e elenko aki ta forma pa komediantenan pisá den e mundu di teater manera Sandy Andrea i tambe Cynthia Martina. Huntu ku nan tin un tremendo grupo ku tambe lo sòru pa trese e mensahe dilanti den un forma chistoso. Un i tur ta keda kordialmente invitá pa no pèrdè e tremendo komedia aki. Último funshonnan tabata kompletamente sold out, pues pasa kumpra bo karchi awe mes pa bo no keda afó. Karchi ta na balor di Nafl 27,50- optenibel na Takia di Teatro Luna Blou, Servei Sta. Maria òf na Time To Time saliña. Pa mas informashon por yama 4622209. Tambe por tira un bista riba facebook: Teatro Luna Blou òf La Tentashon.