Durante un celebracion mey mey di su coleganan y famia na ANSA, Nelson Kelly a recorda su carera profesional di 39 aña den e mundo di aviacion. Sr. Kelly a inicia dia 7 di november 1976 como Aspirant Luchtverkeersleider. Pa casi un aña despues september 1977 e la bira Assistant Luchtverkeersleider y 24 di april 1978 e la asumi e responsabilidad como Luchtverkeersleider. Di eynan e la keda crece den su profesion unda prome di mei 1986 e la ricibi e promocion di Luchtverkeersleider eerste klasse. Pa 12 di maart 2001 Chef Luchtverkeersleider despues 12 di october 2011 Chef van de Wacht.

Cu henter e proceso di independisacion y introduccion di ANSA N.V. Nelson Kelly a asumi e posicion di Manager Air Traffic Control na inicio di e aña aki.

Un carera cu ta inspira hopi manera e Minister di Transporte, Sr. Otmar Oduber a comenta. Sr. Oduber ta bisa: “Nelson Kelly sigur ta un ehempel pa hopi di e hobennan cu ta den e funcion aki. E la demostra un amor enorme pa e mundo di aviacion cual sigur ta hopi ta esunnan cu tin un admiracion special pa Sr. Kelly.”

Nelson Kelly conhuntamente cu su famia a declara di no tuma un despedida pero lo t’ey pa conseha y guia unda cu mester demostrando un biaha mas su dedicacion na e profesion aki.

Como un simbolo di cariño special Sr. Kelly a ricibi un plakkaat for di e mandatario y varios regalo di su coleganan cu tin un aprecio grandi pa nan colega cu ta baha cu pensioen. Aunke nan sa cu nan lo mire frecuentemente, tur presente a desea Nelson Kelly tur clase di exito y pa e disfruta su tempo liber bon mereci.