Ayera durante un resepshon na e ofisina prinsipal di pòstkantor na Groot Kwartier, e nòmber nobo di pòstkantor lokal – Cpost International – a keda presentá. Esaki a sosodé den presensia di algun invitado i empleadonan di Cpost International. E kambio di nòmber primeramente a bira nesesario despues di e desmantelashon di Antianan Hulandés. Despues di tabata tin e nòmber di Nieuwe Post N.A. N.V. ya pa 10 aña largu, a bira nesesario pa kambia e nòmber. Ta bini aserka, ku e merkado internashonal den kual e kompania ke profilá su mes tambe a kontribuí pa yega na e desishon pa kambio di nòmber. E ‘C’ den Cpost International ta representá nòmber di Kòrsou konosí komo Curaçao den merkado internashonal. E palabra ‘post’ ta representá e hecho ku aki ta trata di un kompania postal. “International’ ta e merkado internashonal ku e kompania ke dirigí su mes aden. Ta konosí ku mundialmente pa mantené un volumen di karta stabíl, ta un reto diario. Esaki ta pone ku e kompania mester kambia di direkshon pa asina hasi posibel pa mantené su entradanan i tambe pa e kontribushon ekonómiko ku e kompania ta duna siendo un kompania di Gobiernu. Mester kambia rumbo. Oportunidatnan pa kresementu mas i mas ta riba e merkado internashonal. Ku e kambio di nòmber, Cpost International ta dal un di e pasonan nesesario pa entrada den merkado internashonal. Ku e kambio di nòmber, ku eksepshon di kambio di logo i estilo di imprenta, tur kos ta keda meskos. Klientenan lo por sigi hasi uso di tur e diferente servisionan normalmente.