WILLEMSTAD-  Durante Marcha Hubenil e tim di inspekshon ekonómiko di Ministerio di Desaroyo Ekonómiko (MEO) a sigui ku kontrolnan riba persona- i establesimentunan ku ta bende kos riba e ruta di Karnaval 2018.

Durante e kontrolnan ariba menshoná e tim di inspekshon ekonómiko di MEO a kontrolá eksistensia i kumplimentu di pèrmitnan ekonómiko i tambe a kontrolá si e establesimentunan en kuestion ta kumpli ku indikashon di preis manera lei ta preskribí esaki.
E tim di inspekshon di MEO a kondusí un total di 95 kontrol durante Marcha Hubenil 2018 di kual 25 tabata establesimentunan eksistente i 70 tabata personanan ku un vent- òf standplaatsvergunning temporal.

For di desèmber último, Ministerio di Desaroyo Ekonómiko a saka un aviso pa medio di un komunikado i tambe riba su página di Facebook, ku tur e rekisito nesesario pa kada persona ku kier bende algu riba ruta di karnaval 2018 por regla un pèrmit temporal pa por hasi esaki. E pèrmitnan aki ta e asina yamá ventvergunning (kual ta un pèrmit pa por bende kos di forma ambulante) i e standplaatsvergunning (pa por bende kos for di un puesto).

Di e 70 kontrolnan riba vent- i standplaatsvergunning, a ekontrá solamente 1 (un) persona ku tabata bende kos for di puesto i 2 (dos) persona ku tabata bende kos di forma ambulante sin e pèrmit rekerí pa por hasi esaki. Pa loke ta trata e establesimentunan eksistente riba e ruta di karnaval ku a keda kontrolá 4 di nan a risibí nan promé atvertensia mirando ku nan no tabata kumpli ku indikashon di preis i solamente 1 establesimentu a keda será dor di e funshonarionan di MEO ya komo esaki no tabatin un pèrmit di establesimentu ni registro na Kámara di Komersio.
Ministerio di Desaroyo Ekonómiko (MEO) ta aploudí e echo ku durante e kontrolnan aki no tabatin muchu infrakshon ekonómiko. Durante e dianan benidero e tim di inspekshon di MEO lo kontinuá normalmente ku kontrolnan rutinario manera esaki a bin ta sosodé.