Willemstad- Riba a trùknan ku ta entrega pan pa Panaderia Isa no tin sèn efektivo komo tal kualke intento òf atrako riba esakinan ta envano.  Atrakadónan for di algun siman pasa a fiha bista riba e trùknan ku ta entrega pan na tienda i supermerkadonan pa Panaderia Isa keriendo ku tin sèn efektivo riba e trùknan aki.  Esaki no ta e kaso.  Panaderia Isa, konsiente di e kriminalidat ku ta asotando nos pais, pa algun tempu kaba a kambia su forma di kobransa di tal forma ku su personal ku ta hasi entrega no tin nodi di karga sèn efektivo huntu ku nan.  Lamentablemente na dos okashon den e último simannan malechornan a tira atrako riba personanan ku ta entrega pan pa Panaderia Isa lagando atras únikamente e personal di entrega herida i troumatisa sin ku nan fechoria a produsí ni un depchi pe atrakadónan. Panaderia Isa ta lamentá enormemente e kasonan kondenabel aki kaminda su personal dediká na hiba pan fresku na e diferente puntonan di benta ta keda atraká.  Manera indiká Panaderia Isa for di algun tempu kaba, enbista di e ola di kriminalidat ku ta asotá nos komunidat, a kambia su forma di kobransa.  Ku e tantísimo formanan elektróniko ku tin awendia pa transferí sèn i hasi pago no ta nesesario mas pa e personal di entrega kore ku sèn efektivo den e trùk di entrega. Panaderia Isa lo sigui hasi su esfuerso pa sigui entrega su pan fresku i di kalidat na tur puntonan di benta hasiendo lo máksimo pa evitá ku ta peligrá bida di su trahadónan fiel.