Willemstad –Patio di e restorant di Academy Hotel Curaçao den Punda ta kla pa keda transformá den un terasa digno di un típiko barrio latino selebrando un grandioso ‘Latin NIght’ djaweps 30 di aprel 2015 Manera por spera di un bèrdadero ‘Latin Night’ lo tin diferente plato sukulento i tremendo ambiente kultural ku músika i un seshon spesial pa siña i praktiká diferente baile latino. E menú di tres tanda selektá pa Shèf-den-práktika Albert Minguel di e skol ICUC bou di guia di Shèf Emelton “Tonchi” Clementina, ta konsistí di diferente plato inspirá pa resetanan di pais nan manera Argentina, Brazil, Colombia, Venezuela, Cuba i República Dominicana. E konsepto akí ta otro inisiativa di hóben nan dediká na desaroyo di nan abilidat nan profeshonal. Segun representante di e departamentu di Benta i Merkadeo di Academy Hotel i alabes studiante di Nilda Pinto, Corliën Rosalia: “… e ‘Latin Night’ ta ideal pa e tim kompleto sigui demostrá kreatividat, hospitalidat i abilidat di organisashon den union. Ku e aktividat akí nos ke sera luna di aprel ku otro evento atraktivo pa igualá i surpasá e éksito di e evento “Jazz & BBQ” ku a tuma lugá na kuminsamentu di luna. Pa nos tur komo studiante den proseso di práktika esaki ta otro selebrashon di nos kresementu komo hóben profeshonal.” Academy Hotel Curaçao ta invitá komunidat pa invertí den desaroyo di future profeshonal nan di Kòrsou, probechando di e pakete atraktivo pa ‘Latin Night’ na rason di Fl. 50. E pakete ta optenibel na resepshon di Academy Hotel Curaçao den Prinsenstraat 80. Reservashon delantá ta rekerí pa garantisá espasio. Pa reservashon i informashon por mail na salesacademyhotel@academyhotelcuracao.com òf yama (+5999) 461 9319.‘Like’ i sigui e página di Facebook di Academy Hotel Curaçao tur dia pa keda na altura di e último desaroyo nan. Tambe por pasa libremente pa sera konosí ku e lokalidat i restorant den sentro di siudat akí na kualke momentu. Keda pendiente pa por disfrutá di e diferente speshalnan di estadia den e hotel i mas evento ku kuminda nan delisioso di e restorant.