Willemstad, 3 di yuli 2016 – ‘Segun statistiknan internashonal pa aña 2020 depreshon lo ta e enfermedat number 1 rònt mundu, inkluyendo Kòrsou. Un di kada sinku hóben entre 12 pa 18 aña di edat ta biba ku un enfermedat òf problema mental, pero tòg mas ku mitar no ta hañando e yudansa ku nan mester’. ‘Nothing Physical’ (Nada Físiko) ta un proyekto di JCI IOBA Curaçao ku ta bai trese kambio den e situashon aki dor di konsientisá, informá i eduká nos komunidat i espesialmente nos hóbennan.

Durante e próksimo lunanan e tim di ‘Nothing Physical’ enkabesá pa Ana Karina Montana Garcia, demas miembronan di JCI IOBA Curaçao, spesialista i ekspertonan lo pone atenshon riba importansia di salú mental. ‘Nothing Physical’ tin komo meta prinsipal pa bira e bos i e punto di informashon i konekshon entre miembronan di nos komunidat i instansia i organisashon ku ta ofresé yudansa i sosten riba diferente nivel di salú mental. Un persona saludabel ta físikamente, mentalmente i sosialmente bon di salú. Esaki no ta simplemente ora no tin un malesa òf enfermedat físiko presente. Un persona por haña un enfermedat mental so tambe, sin ku físikamente algu falta e persona. Pero kiko ta un enfermedat mental? Salubridat mental ta ora un individuo ta den bon estado di salú den kual e por dal ku strès normal di bida, por ehersé trabou produktivo i por duna un aporte na desaroyo di su komunidat. Mundial mente nos konosé diferente enfermedat mental, pero lamentablemente aki na Kòrsou ainda hopi di esakinan ta tabú òf nos no ta tribi di papia tokante e malesa òf problema ni tampoko pidi yudansa. Esaki mester kambia!

Nos komunidat i spesialmente nos hóbennan mester sinti nan mes konfortabel pa papia tokante nan sintimentunan, problemanan i posiblemente enfermedatnan mental. Esaki por pasa solamente na momentu ku nos komunidat aseptá ku ta eksistí enfermedatnan mental i ku tin diferente manera pa yuda un persona ku un enfermedat mental meskos ku tin yudansa pa enfermedatnan físiko. Apesar ku algun trastorná mental ta di término largu, ku e debido tratamentu hopi persona por tin un bida stabil i produktivo. Desafortunadamente tin hopi di nan ta pena pa añanan largu sin haña yudansa. Meskos ku pa un problema serio di kurason bo mester di un spesialista di kurason, asina tambe pa malesa mental bo tin mester di e atenshon di hende ku sa kon pa trata e malesanan ei.

Ku aktividat i kampañanan manera ‘Sharing Hope’ i ‘Free Hugs’ JCI IOBA Curaçao ta bai konektá ku nos komunidat ku informashon i charlanan tokante e diferente enfermedatnan mental, kon pa detektá esakinan i tambe kiko por ta e konsekuensianan si un persona no risibí yudansa òf tratamentu na tempu. Es mas, e sentido di urgensia pa atendé ku un malesa mental for di momento ku detektá esaki i no warda te ora ta lat ta wòrdu enfatisá durante e kampaña aki. E trayektoria ta unu largu, pero hopi nesesario. Pa mas informashon i tambe e aktividatnan benidero por bishitá e página di Facebook ‘Nothing Physical’.

Pa mas informashon por fabor tuma kontakto ku Sra. Sueena Francisco (2016 Presidente JCI IOBA Curacao) na +599 9 568 3362 of Sra. Genesis Martis na + 599 9 681 2255 (2016 Sekretaria JCI IOBA Curaçao).