WILLEMSTAD- 26 di mei 2014:- Na luna di mart último Ofisina di Turismo di Kòrsou (CTB) a duna informashon tokante grabashon di un novela di un kanal di Brazil aki na Kòrsou. E grabashonnan a tuma lugá di 31 di mart pa 9 di aprel último. E novela ku ta hiba di titulo “Vitoria” su gran estreno lo tuma lugá dia 2 di yüni próksimo. E di dos kanal di televishon mas grandi na Brazil kual ta Rede Record a skohe pa graba parti di nan novela aki na Kòrsou. A graba den aria di Otrobanda, Punda, Curaçao Sea Aquarium, diferente playa entre otro Knip, Santa Barbara Plantation i riba brùg Emma. E gran estreno di e promé kapítulo lo ta dia 2 di yüni próksimo. Pero ya kaba por mira promoshon pa e novela riba e kanal Rede Record. Pa wak e clip promoshonal di e novela bai riba e link: http://www.recordistas.net/2014/05/vitoria-assista-ao-clipe-de.html. E grabashon kompletu di e promé 4 kapítulonan a tuma lugá aki na Kòrsou. Ademas durante di e diferente episodionan lo interkambiá entre partinan graba na Kòrsou i na Brazil. E novela lo tin un durashon di aproksimadamente 8 luna i  e lo wòrdu mira pa aproksimadamente 59 mion persona na Brazil mes i mas di 200 mion den e 150 paisnan kaminda e kanal su transmishon ta yega. Na mes momentu CTB lo hasi promoshon riba wepsait di e kanal kual ta www.rederecord.r7.com ku tin un promedio di 29 mion bishitante pa luna. Ademas por mira tambe diferente informashon di e novela riba e wepsait www.recordistas.net kual ta un portal di e kanal di televishon. CTB ke gradisí nos komunidat pa nan koperashon na momentu ku polis a sera kaya pa e grabashonnan por a tuma lugá. Mirando e durashon di e novela por bisa ku ta pa un temporada basta largu lo bai keda mira imágennan di Kòrsou riba pantaya di televishon na Brazil. CTB ta mira e novela aki komo un oportunidat mas pa laga e brazilero konosé mas di nos dushi isla Kòrsou.