Kantika Nobo di Shamiro Anita
Willemstad – Awe e artista hóben Shamiro Anita ta lansá su kantika nobo nobo titulá ‘Nunka Entrega’. Despues di e hitnan manera “Move Tur Montaña”, “Un Brasa So Mi Ke”, “Kalma E Tormenta”, i “Hala un Rosea” awor Shamiro Anita ta bèk pa motivá tur hende pa nan nunka entrega ni maske kon difisil e situashon ta.
Tin asina tantu tipo di situashon ku nos tur ta enfrentá tur dia ku por pone nos yega na e punto di entrega. Por ta situashon den nos famia, na trabou, na skol, ku nos negoshi. Ku e kantika nobo aki Shamiro ke sigurá nos ku nos NO mester entrega nunka! Dios semper tei pa yuda i motivá nos.
Letranan di e kantika ta bisa “Mi no lo entrega, Mi lo sigui perseverá! Maske kon duru e bataya, lo mi tin viktoria den e guera. Den Dios mi soñonan lo realisá. Mi no lo entrega
Mi lo keda konfia. Maske ku mi faya na kaminda, lo mi lanta para i sigui purba. Dios lo yuda mi logra mi meta”.
Shamiro su orashon ta pa nos tur por perseverá. Dios ta fiel i e tin un miho futuro plania pa bo. Deposita bo fe den Hesus i nunka lo E faya bo. Di kurason, Shamiro ta spera ku mas i mas hende lo keda toka, animá i bendishona ku e kantika nobo aki. Shamiro ta gradisi Dios na promé luga pa sigui yud’é logra su meta kual ta impaktá tur hende ku skucha su musika ku mensahenan positivo for di e palabra di Dios. Shamiro ta sumamente agradesido tambe na tur hende ku a yud’é i ta sigui sosten’é.
Ta trata aki di un kantika inspirativo ku un dushi melodia estilo Classical Pop / Balada. Pueblo por solisitá e kantika nobo na tur radio na Korsòu, Aruba, Bonaire i Hulanda. Tambe por skucha e kantika nobo aki riba soundcloud https://soundcloud.com/shamiro-anita/nunka-entrega of bishita shamiro su página ofisial, www.shamiromusic.com, kaminda bo por skucha e kantika i tambe kumpr’e. Por kumpra e kantika tambe riba iTunes, Amazon, Spotify i Pandora.
Esaki ta e prome kantika di Shamiro su album nobo ku lo sali e aña aki. Pa mas informashon tokante di esaki bishita Shamiro su Facebook Page: www.facebook.com/shamiromusic.