Nos tur ta benefisiá: konfiansa, kresementu ekonómiko i empleo

WILLEMSTAD – Kòrsou mester logra organisá su kresementu ekonómiko na un manera konvinsente ku komo meta pa krea mas konfiansa, krese ekonomia i kuponan di trabou. Kreamentu di kuponan di trabou pa medio di mas aktividatnan empresarial ku karakter duradero lo pone ekonomia desaroyá bon. Segun Kámara di Komèrsio, e foko di gobièrnu (nobo) mester ta riba esei, di moda ku por krea espasio duradero pa mehorá e nivel di desaroyo sosial kaminda gobièrnu i komunidat ke i mester bai. Awe tardi durante un konferensia di prensa direktiva di Kámara di Komèrsio a presentá i aklará su vishon i prioridatnan.

Kámara ta enfatisá ku solamente empresanan duradero por krea puestonan di trabou duradero. Empresarionan ta benefisiá di esei, pero sigur tambe e empleadonan ku tin siguransa di un entrada. Gobièrnu i komunidat tambe ta benefisiá.

Prioridatnan

Loke a karakterisá ekonomia e último añanan ta sero kresementu, produktividat abou, rendimentu abou riba invershonnan, desempleo hubenil haltu, gastunan konsumptivo haltu, fayonan struktural di fondonan sosial i impuesto haltu riba labor. E ora ei ta mas evidente pa enfatisá asuntu manera konvertí vishon di desaroyo den maneho konsistente, enseñansa moderno, nesesidat pa e mekanismo di merkado funshoná, inovashon i invershonnan privá, spesialmente for di eksterior ku kapital eksterno. Ta masha kla ku niun instansia por logra esaki e so: ta rekerí un sierto nivel di kordinashon i sinkronisashon, en breve un konsiensia ku mester organisá e kondishonnan pa kresementu. Den prolongashon di esaki Kámara e último añanan a apliká e siguiente áreanan di prioridat: maneho di imigrashon, enseñansa i merkado laboral, mekanismo di merkado, red tape, privatisashon, sistema di impuesto i eksportashon, i e ta aspirá un konsenshi nashonal kaminda ta atendé e asuntunan aki enérgiko i ta krea e kondishonnan pa kresementu. Si e maneho ta bon organisá i di forma konsistente, nos tur ta krese.

Áreanan di atenshon

Kámara ta partidario pa un maneho di imigrashon kaminda na un banda ta atraé invershonista privá di afó (inkluso e-zone, expatriats, doñonan di un di dos kas) i na e otro banda ta stimulá enseñansa transnashonal. E puntonan aki mester haña e atenshon nesesario inmediatamente. Pa por logra un kresementu di ekonomia i eksportashon, mester kombiná tambe e problemátika di enseñansa i merkado laboral. Ku pasonan pa enseñansa di fishi a subi un bon kaminda. Tambe mester paga mas atenshon for di skol básiko na materianan kreativo, pasobra e aspirashon mester ta pa krea mihó empleado i mas empresario. Ademas mester buska kontakto ku e mihó institutonan edukashonal rekonosé rònt mundu pa konvensé nan establesé aki. Riba e punto di e merkado laboral tin un pregunta importante riba mesa pa yega na solushon pa konfliktonan laboral i pa krea e prosedimentunan eksistente di retiro pa ámbos partido, e dunadó di trabou i e empleado.

Pa loke ta e punto di adaptashon resien di e suèldu mínimo opinion di Kámara ta ku mester rashonalisá i konsiderá asuntunan asina di un forma ophetivo i no mester ta asina ku esei ta sosodé de paso asina i ademas den un ambiente kompletamente isolá. Sin ku produkshon ta subi kompanianan lo kai den problema i posiblemente hasta nan mester nan porta, loke hustamente no por tabata e intenshon di e adaptashon. Riba e punto di mekanismo di merkado a pone e promé paso ku lantamentu di e Outoridat di Merkado na kaminda pa un mihó mekanismo di merkado; awor mester ehekutá ainda.

E opshon pa hasi deklarashon fiskal di forma elektróniko na servisio di impuesto i mehorashon di e servisio públiko realisá pa e Ministerio di BPD i e trayektonan nobo pa despachá merkansia na Duana, ta logronan importante den e esfuersonan pa redusí red tape dentro i na final di e trayekto empresarial, sinembargo ta importante tambe pa eliminá e red tape na kuminsamentu. Loke por ta modelo pa esaki ta e redukshon di burokrasia pa optené pèrmit pa e-zone; kriterionan material tékniko ophetivo ta sirbi komo base ku kua mester kumpli pa protekshon di e interes públiko i ku no ta permití pa ni gobièrnu ni e empresario agregá márgen na e base di smak i koló suphetivo. Awor ku Damen Shipyards ta drenta CDM i e desaroyonan ku por spera rondó di e refineria Isla a aktualisá privatisashon atrobe. Den e kuadro aki Kámara ta pensa riba krea mas posibilidat pa mara barku na Bulbai pa atraé mas empresario privá di karakter internashonal, banda di Isla.

Kámara ta rekonosé ku den e ámbito di belasting a start sierto desaroyo, pero ainda tin pendiente pa realisá e idea di tax & duty free riba benta na turista (krusero) i pa stimulá hende pa bai biba den sentro di siudat. E pensamentunan di Kámara enkuanto stimulá eksportashon ta konosí: logra mas tantu posibel ku kompanianan ta ekspandé nan volúmen di benta pafó di Kòrsou. Kámara ya a pone paso importante den e direkshon ei ku bira miembro di Holland House na Bogotá, un fórmula ku ta duna fruta pa diferente empresa lokal ku ta partisipá, aparte di un sosten práktiko den aserkamentu di merkadonan den eksterior dirigí riba eksportashon pa aya.

Komèrsio

Bon Komèrsio

Den e tempu binidero Kámara lo ta dirigí riba stimulá i promové konfiansa den bon instinto empresarial. Pa esei Kámara lo akudí di nobo na un kampaña anterior di motivashon ‘Bon Komèrsio, Mas Trabou, Mihó Kòrsou’. Kámara lo stimulá empresanan tambe pa bira partísipe den Curaçao Business Point Platform komo hèrmènt pa logra eksportashon, pa kua ta eksigí ku ta firma un kódigo di kondukta. Ku e kampaña Kámara lo krea un mihó bista riba kuantu komèrsio lokal den su totalidat, for di bista di komunidat, ta kontribuí na aktividatnan sosial a base di social corporate responsibility.

Enkuentronan tékniko ku empresarionan

Un otro punto di akshon di Kámara ta organisashon di i/òf partisipashon na enkuentronan pa promoshon di inisiativa empresarial den eksterior a base di un programa pa promové perisia i riba tereno di tendensianan den komèrsio internashonal. Den prolongashon di esaki ta organisá enkuentronan komplementario i ta destilá temanan pa deliberá mas leu ariba i kaminda ta nesesario ta invitá ministerionan relevante; por ehèmpel MEO kaminda ta trata mishonnan komersial ku e meta pa oumentá e chènsnan pa eksportashon.

Seshonnan di networking

E seshonnan di networking ku tin programá lo ta dirigí riba kon for di inisiativanan empresarial riba e terenonan prioritario pa realisá kresementu. E agèndanan ku esaki lo produsí lo ta tópiko den e kontaktonan di Kámara i e respektivo ministerionan di moda ku Kámara por ehersé su papel mihó di defensor di interes i mediadó. Kompas ekonómiko di desaroyo: emprendé internashonalmente. Den e ekonomia (nobo) ta pone kada be mas atenshon na desaroyo i eksportashon di propiedat i servisionan intelektual. Esaki ta generá oportunidatnan nobo pa inovashon, eksportashon i kresementu ekonómiko duradero pa pais ku sa probechá di mihó manera. Ademas, rònt mundu e reglanan fiskal ta kambiando, loke ta pone ku ta atribuí e ganashinan di empresanan multinashonal kada be mas na e paisnan kaminda nan ta pèrkurá mas tantu pa balor agregá i kaminda tin un korelashon fuerte entre krea balor i konosementu/kalidatnan di e personanan envolví.

Pa Kòrsou esaki no ta diferente; e ekonomia chikitu habrí ta obligá nos pa kontinuamente hisa tantu invershonnan lokal den kapasidat di produkshon komo invershon i eksportashonnan direkto djafó di merkansia i servisio na un nivel mas haltu, si es ku nos ke logra un kresementu ku nos por karga, ku potensial pa sigui krese.

Rekurso Humano

Esensial ta pa atraé i forma hende ku por duna un kontribushon positivo na komunidat i na sobrá desaroyo, mantené e hendenan aki pa komunidat i maksimalisá e chènsnan pa e hendenan aki apliká nan kapasidat na benefisio di komunidat. E strategia aki di maneho di rekurso humano ta rekerí ku mester invertí den legislashon i maneho di imigrashon, enseñansa, fleksibilidat riba merkado laboral, dominio di gastunan salarial, stimulashon di produktividat i hasi negoshi den eksterior. Mester buska respaldo sosial pa espasio finansiero adishonal i respaldo polítiko pa invershonnan den e asuntunan esensial aki.

Den kuadro di tur esaki Kámara ta partidario di un esfuerso konhunto di sektornan públiko i privá pa generá i utilisá e forsanan inovativo ku ta nesesario pa hinka entusiasmo nobo den ‘Kòrsou Nashon di Eksportashon’. P’esei sektor komersial ta premirá un aliansa stratégiko entre sektor públiko i sektor privá kaminda ta traha na un maneho ekonómiko komun. Sentral den e aliansa stratégiko ta kon ekonomia por proveé komunidat di un forma duradero ku medionan pa su eksistensia i kiko esei ta nifiká pa e eskohonan ku ta hasi awe.

Transishon

Punto di salida pa un transishon eksitoso pa un nashon di eksportashon, aparte di un programa ekonómiko riba término kòrtiku, ta pa prepará un programa di akshon pa desaroyá potensial humano (enseñansa i entrenamentu, fleksibilisá merkado laboral) i drecha e klima di invershon (invertí den eksportashon i inovashon, i redukshon di ‘costs of doing business’) dentro di un kuadro di ophetivonan di término largu. For di salida ta dedikashon pa sostené i aspirá pa e ophetivonan di término largu ta forma e base pa konfiansa di invershonistanan den e direkshon ku Kòrsou ta skohe.

Pa por realisá riba término medio e vishon di Kòrsou komo nashon di eksportashon ta rekerí un organisashon dirigí i sólido di e proseso pa alkansá un maneho sólido dirigí riba esei. Mas konkreto partidonan por ta riba e ophetivonan di término largu i mas amplio i mas sosten por logra pa esei den komunidat, mas por spera di e efekto favorabel pa ekonomia. E efekto positivo ei lo ta tambe e resultado di invershon den hende, mehoransa di bienestar di pueblo ku den tur kos ta para dilanti. Resumiendo: shared growth, nos tur lo benefisiá di dje.