Postulashon pa Appeltjes van Oranje 2017 a habri

Appeltjes van Oranje 2017 ta fókùs riba mucha ku ta lanta den situashon vulnerabel. Ku e tema ‘Mucha Fuerte’, Oranje Fonds ta buskando organisashonnan ku ta pone man na obra pa e muchanan aki. Pa por gana e premio, un inisiativa mester yuda mucha ku nan desaroyo, drecha nan ambiente di biba òf sostené mayor ku kriansa di nan yunan. Postulashon ta habrí te ku 23 di sèptèmber via oranjefonds.nl/appeltjes. Na mèi 2017 lo entregá Appeltjes van Oranje na tres organisashon ganadó.

 

Vulnerabel

Mucha ta un di e gruponan mas vulnerabel den nos komunidat. E situashon den famia i nan ambiente di biba ta di gran influensha riba nan desaroyo. Afortunadamente den nos reino tin hopi inisiativa ku ta traha na un mihó desaroyo di mucha i famia. Por ehèmpel tin organisashon ku ta regla un ‘buddy’, un kompañero, pa mucha ku tin problema ku siñamentu òf tin un atraso den nan desaroyo di idioma. Tambe tin ku ta yuda famianan den bario sostené otro famia ku debésenkuando mester di apoyo. Oranje Fonds ta buskando e ehèmpelnan bunita aki.

‘Balor invaluable’

Ronald van der Giessen, direktor di Oranje Fonds, ta splika: “Tur mucha mester haña e mésun oportunidatnan den bida. Pero pa motibu di faktornan manera un situashon difisil na kas òf un atraso di idioma, tin mucha ku ta keda atras. Inisiativanan ku ta yuda nan progresá den bida ta di un balor invaluable. Nos ta buskando inisiativanan ku ta eksitoso den nan manera di traha, ku ta yuda mucha desaroyá nan mes i ku di bèrdat ta hasi un diferensha den nan bida. Nos ta hasi un yamada na tur proyekto ku ta hasi esaki pa postulá nan mes pa Appeltjes van Oranje!”

 

Appeltjes van Oranje

Tur aña Oranje Fonds ta otorgá Appeltjes van Oranje na inisiativanan sosial ku ta trese diferente grupo di hende den nos komunidat huntu i ku eksitosamente ta sòru pa un ambiente abitabel. Ku esei nan ta un gran ehèmpel pa otro hende. E premio ta konsistí di un eskultura di bròns, trahá dor di Prinsès Beatrix, i un suma di € 15.000,-. Rèina Máxima ta entregá e premionan tur aña na Palèis Noordeinde. Den añanan di lustro, Rèi Willem-Alexander ta entregá e premio.

 

Oranje Fonds

Oranje Fonds ta sostené inisiativanan sosial na Hulanda i den e parti Karibense di Reino Hulandes. Den e aña ku a pasa e fondo a sostené 9.300 inisiativa ku un total di 31 mion euro. Esakinan tur ta inisiativa ku ta sòru pa hende topa ku otro, ta menos solitario, ta haña mas komprenshon pa otro i ta hasi algu pa yuda otro hende. Oranje Fonds ta risibí apoyo finansiero di entre otro Nationale Postcode Loterij, De Lotto, donashon individual i patrosinio di empresa. For di lantamentu di Oranje Fonds, Rèi Willem-Alexander i Rèina Máxima ta e pareha wardadó di e fondo.