Awor aki ku mas di un aña di eksistensia, O’Vega por mira bek riba un aña tras di lomba ku bastante logro. O’Vega a sa, kontrali na tur espektativa, di konkista e titulo maksimo den Festival di Tumba 2015. Tambe e agrupashon musikal a sa di gana kurason di pueblo ku nan tremendo presentashon den kayanan di Korsou durante di nos temporada di karnaval. O’Vega su fanatikonan por a disfruta durante diaña di diferente produkshonan ku a ser pone riba merkado i ku asta a sa di subi riba lista musikal di algun di nos radionan lokal.
O’Vega ta un organisashon ku semper a sa i lo sa di sigui surpasa tur espektativa. Den e kuadro aki nos kier a hasi uzo di e oportunidat aki pa anunsia na pueblo di Korsou ku nada mas i nada menos ku Reinier Lijfrock lo bai hasi su partisipashon den Festival di Tumba 2016 ku akompañamentu musikal di O’Vega. Tambe Reinier Lijfrock lo bai presenta eksklusivamente ku O’Vega durante di temporada di Karnaval 2016 kompletu. Pues Reinier lo tei den tur jump in, jump up, eventonan i marchanan di Karnaval 2016 huntu ku O’Vega i su grupo di karnaval Crazy Diamonds.
Keda pendiente pa mas informashon i desaroyo positivo pa ku O’Vega. I por ultimo na tur nos siguidonan riba medianan social i na tur nos fanatikonan, nos ke anunsia ku O’Vega tei! Nada no ta pasando! Dal bo thee!