Fundashon Pro Bista ku tremendo apertura di Luna di Buzon 2015. Fundashon Pro Bista ta un instansia parsialmente supsidiá ku e meta pa integrá personanan sin bista i esnan ku limitashon visual den nos komunidat i krea asina mihó kondishonnan di biba i di bida pa e grupo aki. Tur aña di nobo, Fundashon Pro Bista ta organisá den luna di ougùstùs nan luna di Buzon, p’asina yega na fondo pa realisá diferente proyekto pa nan klientenan. Den e 15 aña nan ku a pasa nan a logra diferente meta ku e sènnan rekoudá durante di luna di Buzon. Ehèmpelnan di esaki ta Kòmpiuternan, Lès di músika, Porta elektróniko, Kura di rekreo i hopi mas. Pa por logra hasi mas i duna un mihó servisio mester di fondo pa por kubri e gastunan. E fondo nan ta sirbi pa hasi e Fundashon mas konosí den komunidat i asina yega na e klientenan ku Pro Bista ke alkansá. Ademas ku loke nan rekoudá Pro Bista ta logra hasi mas ku e klientenan i bira tur dia di nobo mas profeshonal. E aña aki e fondonan rekoudá ta pa optimalisá e servisio di e Fundashon.

Djasabra dia 1 di ougùstùs, Fundashon Pro Bista ta habri nan luna di kolekta ku un fiesta riba plenchi dilanti di Pòstkantor Punda. E fiesta aki ta konta ku animashon musikal di Orkesta Pro Bista i Ritmo i Grupo di baile di Pro Bista. Lo tin tambe komo artista invitá Romeo Heye, Remy Joss i Kònki ku su Steelband.

Tambe lo tin stand di informashon di Fundashon Pro Bista pa tur hende ku ke haña sa mas di e Fundashon.

Fundashon Pro Bista kier a invitá henter komunidat pa bishita e fiesta di apertura aki. Ta algu ku lo bo no ke pèrdè.

E evento ta di 5or pa 7or di anochi, riba plenchi di Pòstkantor Punda.

Nos ta konta ku henter komunidat su presensia.

Sigui krese ku nos!!!!!!!