Kampaña di CTB dirigí riba merkado Aleman un éksito rotundo!

WILLEMSTAD- Resientemente e video promoshonal di Ofisina di Turismo di Kòrsou (CTB) su ofisina ubiká na Europa (CTBE), dirigí riba merkado Aleman a bai viral riba diferente medionan di komunikashon sosial. E kampaña ta primeramente dirigí na krea un impakto riba  medionan di komunikashon sosial; e video ku por ser mirá tambe via YouTube ta konta di e vakashon di Papa Pasku aki na Kòrsou. E video ta propagá e mensahe ku ‘Pasku a wòrdu kanselá e aña aki, paso Papa Pasku ta preferá di keda Dushi Kòrsou’. Ta importante pa hasi menshon ku e kampaña ta dunando e resultadonan deseá; e kantidat di bishitante riba e página di ‘Curaçao’ riba Facebook i ‘views’ nan riba e propio YouTube ta prueba di esaki. Kòrsou un biaha mas ta sentro di atenshon riba medionan di komunikashon sosial! Den apénas un par di dia, a alkansá 20,995 hende ku a mira e video aki via YouTube, ademas di esaki un kantidat inkontabel di ‘shares’ (kompartí) riba e página di Facebook. Tambe por hasi menshon di e echo ku e video a keda skohe dor di Skift.com komo un di e 5 mihó videonan di siman. Nos ta sumamente orguyoso di esaki. Skift ta un kompania di biahe ku ta ofresé notisia, informashon i servisio na profeshonalnan den e industria di biahe. Pa wak e eskoho di Skift.com bai riba e siguiente link: http://skift.com/2013/12/06/best-travel-ads-this-week-deltas-crew-creates-an-unusual-christmas-carol/ E video a keda produsí na komienso di e aña aki dor di CTBE, un aktor Aleman ta fungi komo Papa Pasku i e video ta keda nará tambe na aleman ku subtitulo na ingles. Papa Pasku ta disfrutá di e playanan di Kòrsou, bishitá dòlfein, snòrkel, sùrf, hasi un rekorido na diferente sitio turístiko i topa ku Kòrsou su hendenan den Punda. Ta mustra Kòrsou na un otro manera; esaki ta un aserkamentu diferente. Ademas di promové Kòrsou ta duna oportunidat na un partisipante di e aplikashon di Facebook pa gana un bishitá na Papa Pasku su destinashon faborito den Karibe, nos isla Kòrsou! Pa mira e video bai http://youtu.be/qXtJn_X2OC8.