Willemstad– UTS ta lansa su servisio di 4G+ na Boneiru tambe, ofresiendo e komunidat Boneriano internèt ku spit haltu riba nan Chippie pa nan por sùrf, stream, download etc kombiná ku Chippie Prepaid Bundles, e paketenan prepago 3 den 1 di Chippie i tambe paketenan 4G+ Premium òf Standard. Ku e paketenan prepago 3 den 1 aki, kliente por papia, SMS i sùrf riba 4G+ pagando un montante fiho, sin ningun obligashon òf gastu adishonal!  Dor di a “ bundle up” e tres servisionan aki den un bùndel, e kliente ta spar mas ku 50% di nan gastunan riba telefòn selular i ta papia pa USD 0,02 pa minüt.  Pues paketenan sumamente kumbiniente! Chippie Prepaid bundles ta konsistí di tres diferente pakete: Chippie Freestyle ta kosta USD 3, ta konsistí di 100 minüt , 5 SMS i 75 MB di 4G+ data. E pakete aki ta bálido pa 1 dia i pa aktivá e servisio aki, mester djis manda un SMS na 3110 indikando CHIPPIE FREESTYLE. Chippie Relax, ta kosta USD 21 i ta konsistí di 1000 minüt, 50 SMS i 750 MB di 4G+ data. E pakete aki ta bálido pa 10 dia i pa aktivá e servisio aki, mester manda un SMS na 3110 indikando CHIPPIE RELAX. Chippie Trendy, ta kosta USD 55 i ta konsistí di 3000 minüt, 150 SMS i 2,5 GB di 4G+ data. E pakete aki ta bálido pa 30 dia i pa aktivá e servisio aki, mester manda un SMS na 3110 indikando CHIPPIE TRENDY. Aparte di e paketenan 3 den 1 aki, Chippie ta introdusí tambe paketenan 4G+ Premium i Standard, kual ta konsistí di solamente 4G+ data. Klientenan por skohe pa e servisio aki pa 1, 10 òf 30 dia. Pakete Standard ta un vershon mas ‘light’ ku e pakete Premium i esaki ta nifiká ku e preis i e kapasidat ta mas abou ku e pakete Premium. Pakete Premium ta enserá un kapasidat máksimo di 200 MB pa solamente USD 2.96 bálido pa 1 dia, 1,5 GB pa USD 16.58 pa 10 dia i 5 GB pa USD 46.78 pa 30 dia. Pakete Standard ta 100 MB pa USD 1.78 pa 1 dia, 750 MB pa USD 11.84 pa 10 dia i 2GB pa USD 29.02 pa 30 dia. Pa aktivá e servisio di 4G+ prepago aki ta masha fásil. Kliente mester djis manda un SMS pa 3434, indikando e kódigo ku ta kuadra ku e pakete di su eskoho. Por ehèmpel, si e kliente ta deseá na aktivá e servisio 4G+ Premium 1 dia so, e mester manda  e kódigo pa 1 dia ku ta 4GVP 1D den un SMS na number 3434 i e kliente lo risibí un SMS bèk na momentu ku e servisio ta aktivá. Pa 10 dia e kódigo ta 4GVP 10D i pa 30 dia 4GVP 30D. Pa pakete 4G+ Standard e ta meskos, solamente e kódigonan ta kambia: 4GVS 1D, 4GVS 10D i 4GVS 30D. Kliente mester tene kuenta si pa e tin sufisiente saldo na e momentu ei pa e por aktivá un di e servisionan aki. Den promé instante UTS 4G+ lo wòrdu ofresé solamente pa Chippie prepago, pero den futuro serkano lo introdusié tambe pa klientenan postpago, p’asina nan tambe por hasi uso di e servisio aki. Ta bon pa enfatisá si ku e telefòn di e kliente ku ta deseá na apliká pa kualke un di e paketenan prepago aki di 4G+, mester tin un frekuensia di 2100mhz huntu ku un 4G+ SIM prepago di UTS. Huntu ku e introdukshon di 4G+ na Boneiru, UTS ta ofresé diferente oferta i kampaña 1)      Klientenan ku un SIM prepago di Chippie òf un SIM di kualke otro provedor lokal, por ‘swap’ (entregá i kambia) nan SIM eksistente i aktivo pa un 4G+ SIM di Chippie kompletamente grátis ora nan entregá e SIM eksistente. Klientenan di Chippie por mantené e mesun number. Klientenan nobo òf ku ta deseá un number nobo, por kumpra un 4G+ SIM pa USD 16, konteniendo USD 10 na krédito di yamada. 2)      Klientenan ku ‘swap’ nan SIM prepago pa un 4G+ SIM, lo risibí un pèchi di 4G+ kompletamente grátis. 3)      E oferta aki ta optenibel for di djabièrnè 28 di mart 2014. Klientenan ku kumpra e pakete 4G+ Chippie Trendy den kombinashon un di e smartphonenan Huawei Y300 òf G510, lo risibí e chèns pa gana un trep ’all inclusive’ pa Miami pa 4 persona. E trep aki ta konsistí di 4 tíket ida i buèlta di Boneiru pa Miami, estadia pa 5 anochi den un hotèl di 4 òf 5 strea, outo di hür pa 5 dia, mas un Visa Gift Card konteniendo USD 1000 pa gasta. E tremendo kampaña aki ta bálido te ku 2 di mei 2014 i lo anunsiá e ganadó den e di dos siman di mei 2014. E ofertanan super atraktivo aki ta optenibel for di djaweps awor, 27 di mart 2014 na UTS Store na Boneiru i tanten tin na stòk i oferta number 3, relashoná ku kompra di telefòn Huawei, si ta optenibel for di djabièrnè 28 di mart 2014. Relashoná ku e introdukshon di 4G+ na Boneiru, UTS Store Boneiru lo ta habrí e djasabra aki tambe, esta 29 di mart 2014, di 10’or di mainta pa 5’or di atardi, pa sirbi tur su klientenan ku kisas no por alkansá pasa den siman. Pues pasa i apliká pa bo internèt 4G+ na UTS Store Boneiru na Kaya Caracas 2, p’abo tambe por eksperensiá muchu mas ku UTS 4G+!