Ministerio di Turismo y Cultura conhuntamente cu Comision Decoracion di Rotonde di Paradera a colabora cu 7 scol di Paradera y vecindario: Maria Goretti, Big Bird Speelschool, Pastoor Krangwinkel, Scol Duna man, Scol Preparatorio nos Paraiso, Emma School y Sint Jan Kleuterschool pa presenta un tremendo decoracion di rotonde. Un obra cu a keda den man di Robby Solognier cu un biaha mas ta kibra tur expectativa. Manera custumber e ta e rotonde cu ta promove cultura. Paradera su rotonde ta bunita den dia y anochi, e ta e unico rotonde cu bo ta mira y scucha!

Diabierna awor lo tin cendemento di luz na e rotonde cual lo keda acompaña pa un programa yena di ambiente. Entretenimento di entre otro Los Paraderos, Arugaldo, Paranda ta nos y muchanan di mama Rosa y Dande lo no falta riba e anochi aki.

Manera ta custumber na e evento di Rotonde di Paradera lo no faya e pesebre bibo den man di Scol Nos paraiso conhuntamente cu Santa Rosa.

Bar y Cushina sigur lo ta bon surti y cada scol lo tin su propio tent. No ta keda nada otro cu un invitacion cordial pa henter e bario di Paradera y vecindario pa pasa y participa na un ambiente di Pasco inigualabel Diabierna 27 di november di 6 or di atardi te cu 11 or di anochi.