Willemstad – Fundashon Parke Tropikal ta anunsiá ku debí na trabounan grandi di mantenshon e parke ta temporalmente será pa públiko te ku fin di yanüari 2014. Direktiva, gerente, trahadónan i boluntarionan a bin ta hasi un tremendo trabou e último dos añanan pa rebibá e parke ku nos tur konosé komo ‘dierentuin’ bek. E na e momento aki esaki ta keda un reto paso di e rekursonan finansiero limitá ku e fundashon ta disponé di dje. Ta danki na donashon di organisashon i personanan ku ta kere den e trayekto nobo aki, e parke por tene su kabes riba awa. Banda di e kompania Jansen de Jong ku a komprometé di traha riba e infrastruktura di e parke awor señor Jordan de Freitas di e operashon Street Legal i Apache Heavy Equipment tambe ta duna nan kontribushon na desaroyo di e parke. Te fin di yanüari 2014 nan ta bai hasi trabounan grandi di limpiesa i demolishon den diferente área di e parke. Esaki a pone ku diferente área den e parke ta bira peligroso pa bishitante nan i sigur nos muchanan. Pa e motibu aki a disidí pa tene e parke sera pa públiko te fin di yanüari 2014. Unabes e trabounan di limpiesa i demolishon ta kla e kompania Jansen den Jong por kuminsá traha riba e mehorashon di infrastruktura. Un danki grandi ta bai na henter e team di operashon Street Legal i Apache Heavy Equipment ku a kontribuí grandemente na desaroyo di e parke. Na komunidat di Korsou nos ke pidi diskulpa i komprenshon pa e inkumbiniensia ku e trabounan aki por trese kuné. Tur esaki ta na bienestar di e parke ku na final di e trayekto henter komunidat di Korsou, grandi i chikí, por disfrutá di dje. Un petishon na tur ku ta kere i ke kontribuí na desaroyo di Parke Tropikal pa sigui  hasi donashon. Por hasi esaki ku un mínimo di 5 florin pa luna un kualke banko lokal. Pa mas informashon por tuma kontakto ku Parke Tropikal na 736 01 88 òf 529 51 51. Pa esnan interesá por sigui tur e desaroyonan di Parke Tropikal via di Facebook dor di simplemente like e page Parke Tropikal Curaçao Zoo & Nature Reserve.