Dia 10 i 11 di mart 2017 e akshonnan di ‘DOET’ ta bolbe tuma lugá. E inisiativa di Oranje Fonds aki a kuminsá ku NLdoet na Hulanda. Den koperashon ku organisashonnan lokal BON DOET, ARUBA DOET, CURA DOET, SXM DOET i STATIA DOET pa algun aña kaba ta un éksito.

Boluntarionan ta kurason di hopi inisiativa sosial. Ku e kampaña DOET Oranje Fonds ta mustra kon importante siudadanonan aktivo ta pa nos komunidat. Pa fundashon i asosiashonnan ta un bunita okashon pa logra algun tarea i uni boluntario nobo ku e organisashon. I naturalmente e akshon ta mustra kon dushi trabou boluntario por ta!

Durante e akshonnan di DOET Hulanda i di e 5 islanan den Karibe ta logra, den 2 dia di tempu, sentenáres di trabou na hopi fundashon, instituto di kuido i asosiashon. Tur hende ta invitá pa partisipá! Na 2016 un total di mas ku 500 a registrá i mas ku 6000 boluntario a partisipá. E organisashon ta spera ku pa e akshon di 2017 lo atraé mas proyekto i boluntario ku e añanan anterior.  Fundashon i asosiashonnan ainda por registrá di un tarea pa drecha un parke di hunga i fèrf un sentro di bario te organisá un paseo pa hende grandi, tur kos ta posibel! Bishitá e site di e diferente islanan pa e último fecha di registrashon di kada isla i tur otro informashon.

Tur hende ku ta dispuesto pa lora manga i duna un man un (parti di) dia pa un fundashon, instituto di kuido òf asosiashon i ke forma parti  di e akshon boluntario di mas grandi di Reino por inskribí. Dor di partisipá bo ta sera konosí na un manera masha dushi i ameno ku trabou boluntario i alabes ta yuda un organisashon ku nan tarea. Entrante yanüari 2017 boluntarionan por inskribí pa un tarea.  Bou di e lema “hopi man ta hasi trabou fásil” e akshon DOET ta stimulá tur hende pa komo grupo nan sera kabes i huntu ku famia, kolega, kompañero di klas òf miembro di un klup di deporte inskribí pa un tarea.

Tur aña di nobo tin sentenáres di organisashon i boluntario ta papia masha bon mes di e inisiativa di Oranje Fonds. Boluntarionan ku a partisipá na e akshon di BON DOET a bisa: “Tabata hopi dushi i efektivo” i “Famia tambe por partisipá i hasi e dia un ‘family day’ hopi dushi”. E boluntario i organisashonnan ku a partisipá na CURA DOET tambe tabata masha kontentu ku e akshon: “Pa nos tabata hopi great pa mira kliente i koleganan den e mesun unifòrm ta traha” i “E grandinan di Ser’i Otrobanda tambe tabata masha kontentu ku nan paseo na Banda Bou, ta hopi aña pasá nan a bai te aya bou”.  

Ku koperashon di Nationale Postcode Loterij, de Nederlandse Loterij, sosten di donashon i kompanianan tur aña Oranje Fonds ta aportá ku kasi € 30 mion na kontribushon finansiero na mas òf ménos 9000 inisiativa sosial na Hulanda i den e parti Karibe di Reino.