Willemstad – Djamars dia 25 di yüli kompania di seguro ENNIA a selebrá Dia di Penshonado pa di sinku biaha siguí. E biaha akí ENNA a festehá e pensionadonan den Hòfi Fidel.

Mas ku 700 penshonado ku un penshun di ENNIA a bini e evento anual, ku a dura di dies or’ te dos or’. Na nan yegada personal di ENNIA a risibí e bishitanan den ambiente di fiesta, i pa kuartu pasá di dies Direktor Komersial Reinald Curiël a yama nan bonbiní ku un diskurso di apertura.

Durante e komementu President of the Managing Board Ralph Palm tambe a presentá un diskurso kòrtiku i komo sorpresa el a toka un solo riba piano pa mustra su apresio pa presensha di tur e penshonadonan ku a akudí na e aktividat.

E Dia di Penshonado akí tambe tabata pa hopi di esnan presente un ban topa dushi i ameno, kaminda por a interkambiá hopi rekuerdo, kompartí hopi nobo i a baila riba muzik di Norman Moron i su banda. Na fin di e fiesta a yama ayó kontentu i satisfecho ku un kordial ‘te un próksimo biaha’ .