E tradishonal plan di fakansi di Selikor pa yunan di trahadó e aña aki tabatin un kontenido otro for di e otronan. Énfasis tabata riba servisio i trabou pa komunidat. Djaluna 28 di yüli último, direktor general di Selikor, ingeniero Wesley Kook a duna inisio na e plan di fakansi 2014. Sr. Kook a dirigí su mes na e muchanan indikando ku su deseo máksimo ta pa den futuro nan por bin okupá kualkier funshon den e kompania meskos ku nan mayornan a hasi esaki. Pastor Raoul tambe tabata di bishita e mainta aki i na su turno a hasi un orashon ku e chikitinnan pa despues nan risibí un bendishon di manera ku tur kos por kana bon durante e tres dianan di aktividat ku Selikor a prepará pa nan. Tur aña di nobo Selikor ta organisá e aktividat aki pa yunan di empleado i di e forma aki ta duna kontenido na e aspekto sosial di e plan di maneho pa personal. Esaki siguiendo e filosofia ku trahadónan ta e propiedat mas importante ku e kompania tin i famia di trahadónan tambe ta pará sentral den su maneho. Ku e meta pa eduká i entretené, den un forma sano, a hinka un programa úniko den otro. Riba e promé dia e muchanan a risibí un charla serka sra. Marelva Jansen i sr. Cesar Paas tokante importansha, abilidat i responsabilidat pa hasi trabounan boluntario. E di dos dia e grupo a bai na CCC, Emmastad Child Care i hofi Wayaca, kaminda nan tabatin diferente tarea di limpiesa i mantenshon. E di tres dia di e aktividat a klousurá e plan di fakansi ku un selebrashon na hofi Wayaca. Selikor ta orguyoso ku kada aña di nobo miembronan di su personal mes ta organisá i kordiná e plan di fakansi i ta bon pa bisa ku komo lidernan ta figurá tambe yunan di trahadónan kendenan ya a yega edat un poko mas grandi. Pues ta un aktividat di famia kompletu.