Djadumingu dia 30 di aprel Plein Café na plenchi Wilhelmina den Punda ta selebrá su di 25 aniversario. Esaki t’e sitio ku ta mantené ‘Wilhelminaplein’ riba mapa i ta forma entrada di Punda, e parti di nos siudat ku poko poko pero sigur ta birando atrobe loke ku nos a bin ta konosé, na unda bo por kana trankil, kontentu i refreská riba e terasa di Plein Café.

Plein Café ta un sitio preferí pa e lokal. Ku su esfera apart, ‘gezellig’ i diferente plato delisioso durante dia, e café a bira un sitio faborito pa hopi hende. Plein Café a konosé diferente kambio den transkurso di añanan, sinembargo a keda fiel na su base: un dushi ambiente. E ta un sitio na unda tur hende ta sinti nan mes na kas, na unda por kome i bebe dushi- tur esaki kombiná ku un bon servisio. Plein Café ta konosí pa su platonan di den dia i pa e menú di serbes di mas amplio na Kòrsou.

E café a habri su portanan riba anochi di 29 di aprel 1998, e asina yamá ‘Koninginnenacht’- esaki miéntras ainda tabata poniendo e toke final na e mobilario di café. “Nos tabata ke a habri spesífikamente riba e dia aki, e rekonstrukshon mester a sosodé hopi lihé. E sitio aki, promé ku nos a habri ainda tabata -e tempu ei un poko desordená”, asina e promé doño di Plein Café sr. Wilfred Hendriksen a indiká.

Entretantu e café a konosé mas propietario. A kuminsá na 1998 ku Wilfred Hendriksen, despues e’la keda tumá na 2002 dor di Bas Kemna i Niek de Munck-Mortier. Na 2007, Paul Drabbe i Danny van Meel a tuma rienda. Nan tur a mantené e simplisidat, ambiente i bon servisio. Manera Paul Drappe ta bisa: “Haña un 10 ta difísil, i mantené un 10 ta mas difísil ainda”.

“Nos ta duna hóbennan lokal un chèns pa gana eksperensia den horeca i pa siña nan nos etikèt i servisio. Dia mi a kuminsá traha akinan, mi no tabata tin eksperensia den horeca. Nunka mi a tene un teblachi den mi man”, asina Danny van Meel a komentá.  

Bas Kenma ta splika ku Plein Café a hasi bon uso di su oportunidatnan. “Nos a mira ku huéspetnan di Plaza Hotel tabata bin desayuná serka nos. Esei a hasi ku nos a kuminsá habri mas trempan. Ya for di mainta tabata tin dushi ambiente serka nos riba e terasa. Hasta ámtenar- i otro trahadónan ku tabata laborá den Punda tabata pasa bebe algu i lesa korant promé ku nan bai trabou”.

“Tambe nos a pèrkurá pa semper tin algu di hasi na Plein Café. Riba Dia di Rei nos ta selebrá den grandi. Den parke tin e merkado liber i aki riba plenchi nos tin fiesta.”

Plein Café ta organisá riba dia di nan aniversario diferente promoshon pa su bishitantenan. Lo hasi nan konosí via di nan ret sosial i riba nan wèpsait lo kompartí eksperensia i testimonionan di nan empleadonan.

Plein Café ta masha orguyoso riba su logro. Despues di 25 aña ainda e restorant aki ta un sitio faborito pa komunidat i bishitantenan di Kòrsou. Plein Café ta un klásiko di Kòrsou ku den transkurso di añanan a haña un lugá prominente den kurason di hopi hende.