WILLEMSTAD – Mas ku un aña despues ku NV Bettina a akudí na gobièrnu pa haña un pèrmit pa por habri un botika na Bándabou, e siman aki e deseo aki a bira realidat. Desde djaluna Botika Barber ta operando un botika di emergensia den kònteinernan adaptá, miéntras ku konstrukshon di un botika permanente nobo ta den un estado hopi avansá kaba.

Ya representantenan di barionan den besindario, inkluso Plataforma Bándabou i Fundashon Vishon Bándabou, dòkternan, suministradónan, relashonnan di trabou i otronan a bai tira un bista den e akomodashon temporal, pegá ku e ofisina di dòkter di kas Sommer na Kaya Irene Schoop 1, skeins dilanti e pòmp di gasolin. E botika temporal aki ta konsistí di dos kònteiner pa ofisina luhoso ku èrko aden, un tonbank, un sala di espera, rèki, etc. E ta mustra masha bunita i asina a krea perspektiva pa esun permanente ku ta na kaminda. Komo operadó di Botika Stakamahakchi na Montaña Rey, NV Bettina a perkurá pa personal profeshonal i ku e sistema di kòmpiuter ta operashonal mesora.

Reglanan rígido

E invitadonan tabatin e oportunidat tambe pa tira un bista den e akomodashon permanente pegá ku e kònteinernan; su konstrukshon ta bai tur ku tin. E representantenan di Bándabou tabata di opinion ku tur esaki a dura muchu mas ku nan a spera. Nan a aseptá mesora ku esaki ta pa motibu di reglanan burokrátiko rígido, hasta despues ku minister Ben Whiteman for di yüli último a duna lus bèrdè pa e proyekto. Tòg a dominá serka nan spesialmente e satisfakshon ku e parti aki di Bándabou por disponé atrobe di un botika propio kaminda nan por bai pa remedi i otro nesesidatnan den un drogueria. Ademas esaki a bira un punto sentral kaminda tin tambe un dòkter i un sentro pa prek. E diferente delegadonan por a mira ku nan mes wowonan loke tin kaba por lo pronto i loke tin na kaminda pa e habitante i bishitantenan di Barber i lugánan den serkania.