Bailamentu di bachata ku chèns pa gana karchi

WILLEMSTAD:- Espektativanan ta hopi haltu pa e konsierto di Prince Royce ku lo tuma lugar próksimamente dia 14 di yüni riba Kleine Werf. Pa mantené e kalentura pa e konsierto Euphoria Management Team a skematisá algun “Prince Royce Night Out” na unda ku un tim di promoshon lo kordiná algun ‘dance off’ di bachata. Públiko presente den forma spontáneo por registrá pa baila bachata i gana karchi pa e konsierto. E “Prince Royce Night Out” lo tuma lugá riba 3 anochi, durante di 3 siman. Kuminsando e siman aki dia 29 di Mei próksimo na Lenso na Jan Thiel, esaki ta un sitio popular pa e ambiente di salsa, kizomba i bachata. Otro siman, dia 6 di yüni e ambiente lo ta na Coco Bomba sitio popular na Zuikertuintje i finalmente pa tèrminá e “Prince Royce Night Out”, dia 13 di yüni na Vegas 360, Boulevard-Mambo Beach. Di akuerdo ku Euphoria Management Team e trayekto pa e konsierto ta kanando zetá, tur kos ta riba skema pa e gran anochi tuma lugá. Pa tur esnan ku ta pendiente pa kumpra nan karchi pa e konsierto, sekshon General ta kosta 75 florin, na porta esaki lo bira 100 florin. Sekshon VIP Gold, ta kosta 250 florin, na porta 275 florin- esaki ta inkluí 2 bebida, akseso na e VIP Gold Lounge i ubikashon pará dilanti di esenario. Sekshon VIP Platinum ta kosta 350 florin i ta inkluí, ‘all inclusive drinks and snacks’, asiento na mesa riba e platinum deck, servisio di waitress na mesa i ubikashon pará dilanti di esenario-* por yama 688.5272