For di djarason mèrdia mas òf ménos 1:15, UTS a konfrontá problema tékniko imprevisto riba su plataforma di mobil i relashoná ku esaki e servisio di Chippie a keda afektá.  Klientenan di Chippie na Kòrsou, Boneiru i tambe Sint Maarten (parti hulandes), no por a hasi, ni risibí yamada te ku den oranan trempan di anochi. Mayoria kliente por a hasi uso di nan data si. Mas den transkurso di anochi, tur kliente por a hasi yamada, pero no ta tur por a risibí yamada. Klientenan ku no por a hasi yamada ainda, mester a paga i sende nan telefòn bèk. Na momentu ku e problema aki a surgi, mesora UTS su prioridat number unu a bira pa mas pronto posibel restablesé e konekshon, pa por sigui brinda tur su klientenan e bon servisio di komunikashon manera semper i su siguiente mainta, mas òf ménos 9:45 e situashon a normalisá bèk. Lokual a pasa ta ku un karchi den e sistema ku ta outentiká klientenan riba e ret a daña i konsekuentemente e konekshon prinsipal a kai afó. Normalmente ora algu asin’aki pasa, e konekshon prinsipal ta bai over riba e sistema di ‘back up’. Debí ku e problema a surgi nèt den oranan di mèrdia (‘piekuren’), e sistema di ‘back up’ no por a karga tur e tráfiko di yamada ku tabata tumando lugá i lamentablemente e tambe a kai afó. Henter e tim tékniko a traha hopi duru durante dia, nochi i mardugá i a logra lanta e sistema di ‘back up’ promé, miéntras ku mester a manda buska remplaso pa e karchi ku a daña na St. Maarten, pa por a restablesé konekshon di e sistema prinsipal tambe. Mientrastantu tur esaki ta tras di lomba. Pa prevení e tipo di situashonnan aki den futuro, UTS lo bai amplia su sistema ku un ‘back up’ adishonal, pa si dado kaso un situashon similar presentá, tin dos konekshon di ‘back up’ disponibel. UTS ta lamentá e suseso aki, kual ta unu totalmente imprevisto i ta pidi su mas sinsero diskulpa.  Mirando tur e inkombeniensia ku esaki a trese kuné, gerensia lo bai pensa riba un manera di kompensashon pa su klientenan i lo bini pronto bèk riba esaki. Un bes mas UTS ta gradesí tur su klientenan pa nan komprenshon i pasenshi durante e situashon ku a surgi.