Pa laga e televidente na Hulanda namorá di Kòrsou …..
WILLEMSTAD- 25 di òktober 2017 – Playanan blanku, awanan blou, solo briante i un naturalesa riku. Sinta riba un terasa relahá, baila i sinti bo liber… esaki ta e fakansi ideal di kada oropeo i e ta alkansabel na Kòrsou! Riba kanal RTL 4, Ofisina di Turismo di Kòrsou (CTB) lo presentá tur djasabra mèrdia, pa sinku siman largu un programa den kual e oropeo lo namorá mas tantu di Kòrsou. E programa lo konta ku historia i tep for di nos mes hendenan, atrakshonnan turístiko i e imágennan di mas bunita di nos dushi Kòrsou!
Semanalmente, Justin Niessen, MasterChef na Hulanda, lo kushiná platonan krioyo pa e televidente. Den e programa, e presentadó Martine Hauwert lo kombersá ku un yu di tera tokante kultura, historia i mas. Tambe un tim di produkshon lo sigui un pareha òf famia durante di un aktividat ku nan ta bai hasi pa asina kapta nan eksperensia pa e televidente disfrutá. Kada episodio ta terminá ku un momentu na unda Chef Justin, e presentadó Martine Hauwert, e pareha òf famia ta kombersá huntu kon e dia a bai i purba e plato krioyo ku a keda prepará. “Komo yu di Kòrsou e kushina krioyo ta den mi, for di chikitu.”, esaki di akuerdo ku Justin Niessen. “Durante di e programa nos lo traha platonan tradishonal di Kòrsou. Platonan ku bo tin kustumber di kome serka bo wela òf na kas serka bo mama. Nos lo duna e televidente ‘un pida’ di Kòrsou; por ehèmpel, un corned beef ku su funchi i banana hasá. Mas krioyo no por!”
Promé episodio
Den e programa ‘Ontdek Curaçao’ (Deskubrí Kòrsou) lo kompartí kon tantu e habitante komo e turista di bishita riba nos isla ta eksperensiá Kòrsou. Diferente sitio interesante lo bini dilanti. For di nos bunita playanan i lanthùis te ku un tour den nos sentro di siudat, bishita na Christoffelpark i tambe aktividatnan akuátiko. Den e promé episodio a mustra entre otro; un rekorido ku ‘buggy’, un bishita na e marshe flotante, i tambe a pasa serka Dinah Veeris. Den otro episodionan por spera un bishita na Museo di Kòrsou, Lanthùis Chobolobo i Serena’s Art Factory konosí pa e popular ‘Chichi’.
E programa ‘Ontdek Curaçao’ a keda pensa i desaroyá dor di CTB den estrecho koperashon ku e produktor VideoToGo. Den e programa lo amplia e plataforma pa e kampaña ‘Right Now In Curaçao’ kaminda ku eksperensianan real di bishitantenan ta keda kompartí na televishon. E promé episodio a bai den aire djasabra último dia 21 di òktober na RTL 4 i a keda ripití riba djadumingu. Kada episodio ta 22 minüt largu. Pa mas informashon por bishita www.ontdekcuracao.tv