Despues cu aña pasa el a ricibi un bon acogida y tabata un exito, e proyecto Earn Your Future di PwC Aruba lo tuma lugar e aña aki atrobe. Segun Edsel Lopez kende ta Senior Partner di PwC Dutch Caribbean, PwC Aruba ta busca formanan pa sigui aporta na e comunidad y specialmente na e hubentud di Aruba. E idea pa e projecto di Earn Your Future a nace a base di un projecto similar na Estados Unidos, unda empleadonan di PwC voluntariamente ta siña studiantenan tocante finansas.

Despues cu PwC Aruba a ricibi bon cooperacion di SKOA, a lansa e projecto Earn Your Future pa e muchanan di 6e klas di Ciclo Basico na September aña pasa. PwC Aruba a bishita un total di 17 scol na Aruba siñando muchanan con pa traha un budget y e importancia di spaar. Na final di e projecto, PwC Aruba a ricibi varios peticion di diferente scol y maestro pa ripiti e programa Earn Your Future durante e aña escolar nobo. Awor cu e aña escolar a cuminsa, PwC Aruba a tuma e oportunidad pa organisa e projecto aki un bes mas.

Edsel Lopez a splica cu aña pasa a lansa e projecto na Puis X School na Dakota, unda cu e mes tabata un di e voluntarionan. E aña aki, PwC Aruba lo cuminsa cu e projecto na Scol Basico Washington na e districto di Noord, unda riba e prome dia ya lo ta siñando mas cu 80 studiante tocante budget y spaar. E projecto lo cuminsa dia 31 di Augustus y lo dura 3 luna, bishitando 20 scol y lo ta siñando mas cu 800 studiante con pa ta responsabel cu placa.

E projecto Earn Your Future ta uno hopi gusta entre mayornan, maestronan y cabesantenan pero tambe entre e empleadonan di PwC Aruba. E empleadonan di PwC ya a ricibi les pa siña con pa duna les na muchanan y trece e mensahe den un manera cu e muchanan lo por compronde y aplikca tur loke nan a siña facilmente. E parti bunita di e projecto aki ta cu PwC Aruba no ta siñando solamente muchanan con pa ta responsabel den e parti financiero pero e muchanan ta comparti e mensahe aki tambe cu nan mayornan y famianan. Cu e projecto aki PwC Aruba kier comparti nan conosimento cu e comunidad y specialmente cu e muchanan. PwC Aruba ta un compania cu ta traha cu cifras y esaki ta algo cu nan ta desea pa comparti y cu lo beneficia e muchanan den futuro.