Galeria Kas di Kultura tin e plaser di anunsiá ku por atmirá e eksposishon titulá Ladies first di Koos van Veen un siman mas. Públiko ta keda kordialmente invitá pa bishita e eksposishon aki te ku 29 di ougùstùs. Koos van Veen a nase na Utrecht, Hulanda, na 1946. Kreatividat a hunga un papel importante durante henter su bida, pero ta te desde ku el a baha ku penshun e ta dediká tur ku tin na ekspreshonnan artístiko. Despues di a kaba akademia di arte na Utrecht el a traha hopi tempu na Hulanda komo diseñadó di hopi tipo di empake. Turesten el a biaha kasi rònt mundu. Na Isla de Margarita el topa ku su amor grandi. Seguidamente el a biba dos aña kuné na Venezuela despues di kua na 2001 nan dos a muda pa Kòrsou. Aki el a bai traha komo diseñadó riba su mes pa klientenan manera Leañez, Goisco, Sprock i Softex. Na Kòrsou nan a kasa na 2003 i na 2007 nan yu muhé Anouk a nase. Tres aña pasá Koos komo outodidakto a kuminsá ku kerámika. For di klei el a mansa e figuranan femenino mas bunita i karanan ekspresivo. Ya ku e material aki ta karu i pisá alabes, loke ta hasi nan molestoso komo rekuerdo, el a pasa sin problema pa pinta riba tabla komprimí (MDF, medium density fibreboard) ku ta leve i ku si ta bai den maleta. Aki tambe e ta apliká su estilo realístiko, pintando kara di hende muhé i mucha ku sa tin un sombra kolorido aserka. Inspirashon pa tur e obranan aki e ta saka klaramente for di komunidat di Kòrsou, i kaminda seú ta sentral, opviamente e hende hòmber tambe ta bini dilanti. E título ‘Ladies First’ di su promé eksposishon na Kòrsou ta un homenahe na e hopi hendenan muhé Kurasoleño ku ta logra kria nan yunan, hopi be sin e tata aserka, i banda di esei ta traha tambe pa e entrada di e famia. Por bishitá e eksposishon aki te ku 29 di ougùstùs,   di 9:00/12:00 i 14:00/17:00 or (16.30 riba djabièrnè) na Galeria Kas di Kultura, na Koningin Wilhelminastraat 1.