WILLEMSTAD- 31 di òktober 2017 –  Resientemente CTB huntu ku Diamond PR kual ta enkargá ku e parti publisitario na Merka a organisá un lès di kushinamentu interaktivo pa un grupo di periodista na Toronto. E merkado kanades ta unu masha importante pa Kòrsou. Por a konta ku representantenan di korant- i publikashonnan lider inkluyendo The Toronto Star, The Toronto Sun, The Globe & Mail, Travelweek, Canadian Living, Air Canada’s enRoute, Weddingbells i tambe publikashonnan nashonal manera AFAR i Travel + Leisure.

Promé ku a pasa pa e demonstrashon invitadonan por a disfrutá di algun aperitivo i kòktel, pa despues e grupo siña kon pa traha e popular Keshi Yená. Durante di e seshon partisipantenan por a interkambiá ku representantenan di Santa Barbara Beach & Golf Resort, ACOYA Hotel Suites & Villas, Renaissance Curacao Resort & Casino, FBTT, Avila Beach Hotel, Lions Dive & Beach Resort, Eventi Diverso i Ananda Wellness Retreat & Villa Resort ku a djòin CTB riba e biahe promoshonal pa Toronto. E tim di Kòrsou a kompartí nan portafolio i otro informashon relevante ku e grupo di periodista. Esnan presente a keda enkurashá pa kompartí foto i video di e evento usando #RightNowInCuracao riba social media.

Tur periodista por a partisipá na un trivia di Kòrsou i tèst nan konosementu miéntras nan tabata disfrutá di e Keshi Yená. Na mes momentu e partnernan di sektor privá por a kompartí nan konosementu di Kòrsou ku e grupo presente. CTB a risibí masha bon komentario di e manera ku a showcase Kòrsou komo destinashon. Tantu e partnernan di sektor privá komo e grupo di periodista presente a gusta e idea kaminda nan mes mester a prepará e Keshi Yená i despues komé. CTB ta sigui ku su esfuersonan pa huntu ku sektor privá sigui promoshoná Kòrsou na Toronto tambe.