WILLEMSTAD – Nos agrupashonnan musikal di Kòrsou ta pasando den tempunan hopi difísil.  Un i tur ku ta konosí ku farándula na Kòrsou, ta na altura ku durante aña agrupashonnan musikal lokal ta hasi hopi esfuerso pa sobreviví. E situashon difísil di Kòrsou i tambe e echo ku nos ekonomia no ta kanando bon, a pone ku asistensia di e públiko na fiestanan baha masha hopi mes. Den mayoria kaso ta e agrupashonnan musikal mes mester organisá nan aktividatnan ya ku promotornan a bira skars i konsekuentemente na hopi okashon esnan ku ta manehá e agrupashonnan musikal mester hinka sèn pa yuda kubri gastunan di e agrupashon musikal. Pa añanan largu AMAK i Gobièrnunan di turno a establesé reglanan pa protehá nos músikonan durante luna di desèmber i karnaval, pa no permití artistanan estranhero bin aktual na Kòrsou. Ta bin pa menshoná tambe ku despues ku pa añanan nos artistanan no a haña e trato adekuá na hermana Isla Aruba, direktiva di AMAK na 2010 ku sosten di Minister di Hustisia di e tempu ei drs. Kade Wilsoe, a logra di yega na un akuerdo pa trafikashon artístiko entre ámbos pais. E akuerdo aki ta enserá ku enbèrdat luna di desèmber i Karnaval no ta permití entrada di artista Internashonal pa aktua den ámbos pais. Si ta posibel pa den luna di desèmber i no durante temporada di karnaval, ta permití trafikashon di artistanan entre Aruba i Kòrsou. Pero temporada di karnaval si, esaki no ta posibel. Resumiendo pues, di akuerdo ku e palabrashon aki, den desèmber i temporada di karnaval no ta permití entrada di artistanan estranhero, pero den desèmber solamente por tin trafikashon entre artistanan di Karibe Ulandes. AMAK a tuma nota di anunsio di un promotor ku tin plania pa hasi un petishon pa artistanan Internashonal pa e luna di desèmber bin aktua na Kòrsou. Esei no ta posibel konforme e akuerdo ku ta eksistí pa añosnan largu. Si den desèmber o temporada di karnaval tin mas posibilidat pa aktuashon di artistanan, esei mester surgi hustamente pa duna oportunidat na nos artistanan lokal pa rekobrá e pèrdida finansiero di e temporada promé ku desèmber. Direktiva di AMAK a manda su konseho den un karta pa Minister di Hustisia i nos ta spera tambe di por konta ku e sosten di e Minister den e asuntu aki.