WILLEMSTAD-  Ministerio di Desaroyo Ekonómiko (MEO) huntu ku partnernan manera  Curaçao Tourist Board (CTB), Curaçao Hospitality & Tourism Assosiation (CHATA) i Curaçao Ports Autorithy (CPA) a tene un konferensia di prensa den kual huntu nan a duna un retrospektiva riba turismo durante aña 2017 i tambe un proyekshon di e espektativanan pa aña 2018.

E sektor turístiko ta un pilar ekonómiko di sumo importansia, teniendo kuenta ku su kontribushon na desaroyo ekonómiko di nos pais. Turismo ta kontribuí positivamente na kuponan di trabou, reserva di divisa i tambe nos Produkto Bruto Interno.Pa e motibu aki MEO, CTB, CHATA i tambe CPA konhuntamente a bin ta tene konferensia di prensa periódikamente pa duna un mihó bista riba e desaroyonan den e sektor.
Aña 2017 tabata un aña yen di reto pa e sektor turístiko na Kòrsou. Komponentenan manera por ehèmpel bahada di e kantidat di turistanan prosedente for di Venezuela i e situashon ku a surgi ku Insel Air tur tabatin un impakto riba nos sifranan turístiko pa e aña tras di lomba.

Sinembargo e stakeholdernan presente durante e konferensia di prensa turístiko duná dia 05 de febrüari, kada un den nan propio área di ekpertisio ta premirá ku aña 2018 lo terminá riba un nota positivo pa loke ta trata e sektor turístiko.
CTB por ehèmpel ta pronostiká ku lo tin un oumento den kantidat di airlifts ku lo bishita nos isla den e aña aki. Entre otro Kòrsou lo tin un ruta nobo ku TUI for di Brussels den 2018 i tin diferente aerolínea mas ku a konfirmá asientonan adishonal den nan rutanan eksistente pa Kòrsou. Tambe CTB lo lansa un kampaña global den e aña aki ku e ophetivo pa promové Kòrsou, sostené buelonan adishonal i krea mas demanda pa Kòrsou. E reto pa ku Insel Air i turistanan prosedente di Venezuela ketubai ta riba mesa, pero CTB tin konfiansa ku e esfuersonan konhunto pa ku 2018 lo produsí resultadonan eksitoso den e sektor en general.

Kompará ku aña 2016 CHATA na su turno ta raportá ku den 2017 tabatin un kresementu den prestashon hotelero na Kòrsou. CHATA ta optimista ku basá riba e okupashon aktual di hotèlnan na Kòrsou te ku awor i mirando e oumento di airlifts nos tin tur ingrediente pa hasi aña 2018 un aña eksitoso den sektor turístiko. Esaki apesar ku no ta konosí si lo por spera faktornan eksterno ku lo por tin influensia riba e prestashon hotelero den e aña aki.

MEO tambe ta premirá kresementu den aña 2018. Pa e aña aki MEO ta konta ku e sektor turístiko lo aportá ku masoménos 0.8% na e kresementu di nos ekonomia. E proyekshon aki ta basá riba un kresementu di 3% den e kantidat di hospedahe riba nos isla i un kresementu di 9% den turistanan krusero en komparashon ku aña 2017. E posibel kantidat di invershonnan den e sektor turístiko pa aña 2018 no a wòrdu inkluí den e proyekshon ekonómiko di MEO.