pa kolektá datos i alabes traha na un mihó kalidat di bida pa hendenan ku dwarslesi.

Willemstad, – Fundashon Alton Paas ta sigui hasi su esfuersonan pa traha riba bienestar di personanan ku dwarslesi. Pa esei a krea un proyekto piloto di 6 luna kaminda 6 persona ku dwarslesi lo risibí fisioterapia intensivo  konhunto ku terapia via e método di Brucker Biofeedback. Den pasado a diskribí dwarslesi komo e kalamidat di mas grave ku por sosodé ku e kurpa humano. Investigashonnan i tambe éksito di klientenan ku dwarslesi den último dekadanan, a demostrá ku personanan ku dwarslesi tin e potenshal pa desaroyá e funshon bou di e nivel di e leshon i yega na un kurpa mas aktivo i saludabel. Fundashon Alton Paas ta kere den e abilidat, derechi i deber di un persona ku dwarslesi. Kada persona ku dwarslesi mester haña e oportunidat pa dediká mas na su salú físiko, pa mantené i optimalisá su abilidatnan i asina aportá na su mes i su komunidat. Den 2013 Fundashon Alton Paas a manda 3 hoben na Project Walk, Spinal Cord Injury Recovery Center, na Merka pa un programa di terapia spesial pa 3 luna. E desaroyo di e 3 hobennan tabata bisto. Den su eksperensia ku e tres hobennan, ehersisio speshalisá bou di guia, ta nesesario pa optimalisá e persona su abilidatnan. Durante e kongreso 2014 na Hulanda di e Federashon Europeo di Dwarslesi, a informá di un estudio hasí na Reade Revalidatiecentrum Amsterdam konhunto ku Universidat di Amsterdam, ku moveshon di e partinan ku ta paralisá tambe ta yuda pa mantené henter e sistema di kurpa mas saludabel. Pues terapianan usando mashinnan speshal i outomátiko pa e hende lanta para i tambe baiskelnan elektróniko tantu pa man komo pia ta yuda e kurpa den su totalidat. E proyekto aki ta e komienso pa e personanan lokal ku dwarslesi. E proyekto lo inisiá pa fin di mart i lo dura pa 6 luna konsekutivo. E organisashon di “Fysiotherapiepraktijk Schoevers NV”, lo ta na enkargo pa duna e terapianan intensivo durante di e proyekto piloto. Komo parti di e proyekto a inkluí the Brucker Biofeedback Center ku lo bai duna terapia basa riba e estado neurológiko i kiko ta puntonan spesífiko pa konsentrá riba dje durante ehersisio di e fisioterapista. Brucker Biofeedback Center lo duna un blòk di terapia na komienso i na mitar di e proyekto lo duna un otro blòk na kada persona. Na final di e proyekto piloto Fundashon Alton Paas lo evaluá tur aspekto di e proyekto, e.o. fisioterapia, e método Brucker Biofeedback, fasilidat, transporte, finansa i tambe progreso di kada partisipante. E evaluashon aki lo sirbi pa yuda krea un struktura kon mas mihó por yuda personanan ku dwarslesi na Kòrsou. Dia 10 di yanuari 2015 ta bai tin un evento di fundraising “The Fitness Challenge” pa rekoudá fondo pa e proyekto piloto aki. Buska bo karchi na Mensing Kaminada, Beep Beep Rio Canario i Albert Heijn i kontribuí ku un bon kousa. Organisashonnan i kompania por inskribí komo grupo pa e parti di Spinning. Por tuma kontakto na telefòn 5100087 òf email fitness@fundashonaltonpaas.org.