WILLEMSTAD – Despues di e éksito rotundo di e konsierto di Pasku aña pasá Randal Corsen & Friends ta preparando pa un kontinuashon di kita sombré: ‘Paranda di Pasku 2’. Banda di músika di Celia Cruz i La Sonora Matancera lo amplia e programa ku mas aguinaldo i tumba. Esaki ta bai bira un anochi yen di músika eksitante di Pasku i nostalgia. Kantantenan invitá ta Yumarya Grijt, Ñaño Rosario en Heinrich ‘Richie Rich’ Pieter.

E konsiertonan ta tuma lugá djadumingu 20 di desèmber i djaluna 21 di desèmber na Brakapoti Meimei. Karchinan di entrada (na rason di 50 florin) pa e konsiertonan ta optenibel na Mensing’s Caminada, Albert Heijn i Bruna. Pa djaluna por haña karchi tambe na e ofisina di Fun Miles na rason di 30 florin mas 500 funmiles.

E pianista lokal Randal Corsen gusta di ta rondoná pa e mihó músikonan na Kòrsou pa programanan spesial. Luna pasá esaki tabata pa un konsierto íntimo di jazz na Avila. Awor e ta asistí pa e perkushonistanan Pernell Saturnino, Eric Brigitha i Gino Samson, e basista Eric Calmes, e tokadó di kuarta Rhazul Sebelon i e trompetistanan Igort Rivas i Carlos Gonzalez. E anochi ta kompletamente den ambiente di Pasku ku músika Karibense spesial di Kòrsou, Cuba, Aruba, Puerto Rico i Venezuela.

Yumarya Grijt

E aña aki atrobe e kantante Kurasoleño Yumarya Grijt ta hunga un papel prominente. Ta e so por interpretá piesanan di Celia Cruz manera ‘Aguinaldo Antillano’ i ‘Fiesta de Navidad’. Na Europa e ta un di e kantantenan mas pidí di sala. Regularmente e ta presentá ku e trompetista Hulandes di salsa Maite Hontelé ku ta hopi konosí na Colombia i ku ta presentá na Kòrsou tambe ku regularidat. Ademas el a traha ku e pianista Larry Harlow di e banda legendario Fania All Stars. Masha resien Yumarya tabata un di e artistanan prinsipal na e di 21 edishon di e festival Toros y Salsa na Dax, Fransia. Yumarya ta dosente di kantamentu na e konservatorio Codarts na Rotterdam.

 Ñaño Rosario

Orlando ‘Ñaño’ Rosario no mester di niun introdukshon na Kòrsou. Di pursi, komo un di e kantantenan di promé ora di Doble R el a kanta diferente hit grandi, manera ‘Tula, Warda’, ‘Si Bo No A’ i ‘Ayó, Marisse’. Na 2014 Ñaño tabata un di e solistanan na e konsierto Tribute to Doble R ku e orkesta Metropole durante e di sinku edishon di Curaçao North Sea Jazz Festival.

Richie Rich

Nobo den e programa aki ta e popular kantante Heinrich Pieter, konosí komo ‘Richie Rich’ ku pa hopi aña a forma parti di e banda lokal Dreams. Aña pasá e tumba ‘Mi Oloshi’ interpretá p’e tabata e tumba pas popular di karnaval. E aña ei el a presentá tambe ku e orkesta Metropole durante e Curaçao North Sea Jazz Festival. Komo artista total e sa kon pa pone públiko lanta for di nan stul ku su forma di presentá riba tarima, sin papia mes di su talentonan masha spesial di kantamentu.

Bukèt adaptá

Loke por spera ta atrobe un bukèt ekstenso di piesa konosí pa e periodo festivo aki di aña, hopi ritmo di folklor i baliabel ku hende por kanta samsam tambe. Algun di e piesanan ta un ripitishon di aña pasá pero nan no ta morchitá (p’esei ta yama nan ‘evergreens’) i a adaptá e bukèt ku algun piesa fresku i nobo. E estilonan musikal ku e músikonan lo basha riba e públiko ta varia di son, via chachacha, bolero, gaitas, parrandas te tumba i tambú pa di un forma apropiá selebrá Pasku, dispidí di 2015 i prepará pa e aña nobo ku perspektiva nobo.