Willemstad Novèmber 2015- Minister di Hustisia na mei 2014 a pidi Raad voor de Rechtshandhaving ( Raad) pa hasi un investigashon di inspekshon na Raad voor het Welziijn van het Kind (esta Bureau Vooddijraad Curacao.) Raad a husga i a deskribí, riba petishon di Minister, e organisashon i e prosesonan di Bureau Voogdijraad Curaçao. E investigashon aki ta un promé investigashon di Raad riba petishon di Minister di Hustisia. Raad resientemente a publiká e rapòrt tokante di su investigashon riba Bureau Voogdijraad Curaçao. Raad den e rapòrt ta presentá e loke Raad a konstatá tokante di e forma ku Bureau Voogdijraad Curaçao ta duna kontenido na e organisashon i prosesonan. E rapòrt final entretantu a keda entrega na Minister di Hustisia. Den artíkulo 31 di e Lei di Reino pa loke ta mantenshon di órden ta stipulá ku Raad por publiká su rapòrt seis siman despues di a entrega esaki na Minister. Ku publikashon di e rapòrt Raad ta kumpli ku e stipulashon aki den lei.

Konklushonnan di Raad tokante di e organisashon i su maneho

Raad ta konkluí ku Voogdijraad no ta disponé di un deklarashon di disponibilidat aprobá dor di Minister di Hustisia. E maneho dor di e Hunta di Maneho di Voogdijraad den práktika por stroba. E gerensia di Voogdijraad ora ta trata kosnan di kontenido ta responsabilisá na e Hunta di Maneho miéntras ku pa asuntunan finansiero i di personal ta responsabilisá na Minister. Esaki den práktika ta resultá den inklaridat i ta kondusí na trese duda ku Minister tin sierto outoridat pa por duna instrukshon den algun kaso konkreto.

Raad ta konkluí ku e kambionan den organisashon i struktura di maneho no ta di akuerdo ku areglo di estado na Kòrsou i e ordenansa di ku ta regla asuntunan di Empleadonan públiko i organisashon gubernamental.

Raad ta konkluí ku e koperashon entre Bureau Voogdijraad Curaçao i e mayoria di e partnernan den e sektor no ta bon.

Abase di e echonan i loke a keda diskubrí durante di e investigashon Raad ta konkluí ku e informashon disponibel no ta duna un bisa kla tokante di e funshon, struktura di personal i orgániko di Bureau Voogdijsraad Curaçao. Na mes momentu Raad ta konkluí ku no tin norma pa stipulá e konstelashon of kantidat di fte’s i ku struktura di organisashon di Voogdijraad no ta transparente.

For di e investigashon ta sali na kla ku e tareanan i responsabilidatnan di Voogdijsraad no ta stipulá den un ordenansa. Raad ta yega na e konklushon tambe ku e prosesonan di trabou di Voogdijraad ta stipulá pero ku nan no ta keda implementá. Raad ta konkluí ku no opstante e konklushonnan di SOAB pa loke ta trata proseduranan di trabou ainda tabata aktual, tog no a sigui e konsehonan aki.

Raad mas aleu ta yega na e siguiente konklushonnan:

• AO/IC no ta kompletamente deskribí den Voogdijraad komo ku eksklusivamente e proseduranan di trabou ta deskribí;
• E palabrashonnan tokante akuerdo di koperashon no ta stipulá. Dor di esei e no ta transparente;
• E ofisina no ta disponé di un plan di komunikashon. No tin, òf tin poko, komunikashon interno i eksterno dor di e ofisina. No tin notulonan di reunionnan;
• No tin sistema di kombersashon i husgamentu tokante funshonamentu i den trabou;
• No ta hasi investigashon tokante satisfakshon di kliente;
• No tin maneho di formashon;
• No tin siklo di planifikashon i responsabilisashon na e ofisina.       PLannan i reportahe anual no ta keda traha konsekuentemente;
• No tin areglo pa hasi keho na Bureau Voogdijraad Curaçao;
• No ta duna kontenido na e balornan kardinal di gobièrnu pa loke ta trata formulashon i implementashon di un sistema di kombersashon di salida ku empleadonan ku ta bandoná servisio i análisis di e resultado

Pa finalisá

Raad ke pone na tur hende su atenshon ku e komunikado aki ta un kompilashon di e echo i konklushonnan di Raad. E rapòrt den su forma digital ta disponibel riba wepsite di Raad esta: www.raadrechtshandhaving.com